قومی اسمبلی اجلاس،ن لیگی رکن حنیف عباسی اپنے ہی وزراء کے خلاف بول پڑے

(عثمان خان)جے یو آئی(ف)کے سربراہ مولانا فضل الرحمان نے کہا ہے کہ اسٹیبلشمنٹ سیاست سے باہر ہو جائے تو سب خیر ہو جائے گی،عوام سمجھتے ہیں کہ ان کے ٹیکس کا پیسہ آئی ایم ایف کے پاس جائے گا۔

قومی اسمبلی میں اظہار خیال کرتے ہوئے کہا ہے کہ آج پچھتر سال کے بعد معاشی طور پر ملک کہاں کھڑا ہے اس کو دیکھا جائے،ہم دیوالیہ پن کے کنارے کھڑے ہیں،ایوان کے سامنے اپنے کچھ تحفظات رکھنا چاہتا ہوں،ایسے ارکان موجود ہیں جو بجٹ پر تکنیکی بحث کر سکتے ہیں،1988 سے ایوان میں ہوں بہت سارے بجٹ دیکھ چکا ہوں،تمام حکومتیں یہی کہتی ہیں کہ ان کا بجٹ عوام دوست ہے۔

 عام لوگوں میں جو بات زیر بحث ہے وہ ٹیکس ہیں،ہر چیز پر ہر شعبے میں ٹیکس لگائے گئے ہیں،جب عوام سے ڈیمانڈ کی جاتی ہے کہ ٹیکس دیں کہ ملک مضبوط ہو،پھر عوام کے بھی کچھ حقوق ہیں،عام آدمی کو یہ یقین ہو کہ میرے گھر میں اتنا موجود ہے کہ اگلے مہینے تک گزر ہو،ہر شعبہ پر، ہر کمائی میں، ہر کاروبار پر ٹیکس لگا دیے گئے ہیں ،ہم نے آپریشن کیے اور لوگوں کو کہا کہ گھر بار چھوڑ دیں۔

مولانا فضل الرحمان کا کہنا تھا کہ سوات سے شمالی وزیرستان تک علاقہ کو خالی کرایا گیا، لوگوں نے اپنے ہی ملک میں ہجرت کی ،چمن بارڈر پر 9 ماہ سے لوگ دربدر بیٹھے ہوئے ہیں ،یہ میں اور آپ پاک افغان بارڈر کہتے ہیں، افغانستان اسے ڈیورنڈ لائن سمجھتا ہے،ریاست شکی القلب ہوچکی ہے کہ اپنے باشندوں کو تحفظ تک نہیں دے رہی،شرائط لگائیں لیکن قابل برداشت ہوں،ملک کی وفاداری پر آپ قبضہ کرلیتے ہیں کوئی اور بات کرے تو اسے تنقید کا نشانہ بنایا جاتا ہے،آپ کی ملک کے عوام آپ کو ٹیکس نہیں دیں گے، کیوں کہ عوام کو آپ پر اعتماد نہیں ہے،عوام کو پتہ ہے کہ ٹیکس کا پیسہ ان پر نہیں خرچ ہوگا بلکہ آئی ایم ایف کو دیا جائے گا۔

ضرورپڑھیں:شاہ محمود قریشی کا جھوٹ پکڑا گیا،9 مئی واقعہ میں گنہگار قرار

 پارلیمنٹ ہاؤس کے باہر میڈیا سے گفتگو کرتے ہوئے کہ اسٹیبلشمنٹ سیاست سے باہر ہو جائے تو سب خیر ہو جائے گی،حکومت سمجھتی ہے عوام دوست بجٹ ہے مگر ملک کا کباڑہ ہو گیا ہے، اقلیت حکومت کر رہی ہے، پیپلز پارٹی حکومت کا حصہ نہیں ہے۔

پی ٹی وی پارلیمنٹ نے مولانا فضل الرحمان کی تقریر سنسر کردیا.

خیال رہے کہ گزشتہ روز ہی وفاقی کابینہ نے آپریشن عزم استحکام کی منظوری دی ہے جبکہ جے یو آئی، تحریک انصاف، جماعت اسلامی اور اے این پی نے بغیر پارلیمنٹ کی منظوری کے کسی بھی قسم کے نئے آپریشن کی مخالفت کی ہے۔

(عثمان خان)اقلیتوں کو مکمل تحفظ دیا جائے،اقلیتوں کے خلاف واقعات میں ملوث افراد کے خلاف کاروائی کی جائے،قومی اسمبلی میں قرارداد اکثریتی رائے سے منظورکرلی گئی۔

قومی اسمبلی کا اجلاس وقفہ کے بعد دوبارہ شروع ہوا تو سوات معاملہ پر متفقہ قرارداد پیش کردی گئی،قرار داد میں کہا گیا ہے کہ اقلیتوں کے تحفظ کو وفاقی و صوبائی حکومتیں یقینی بنائیں،اقلیتوں کو مکمل تحفظ دیا جائے،اقلیتوں کے خلاف واقعات میں ملوث افراد کے خلاف کاروائی کی جائے،قرارداد اکثریتی رائے سے منظورکرلی گئی۔

قرار دادوزیرِ قانون اعظم نذیر تارڑ نے ایوان میں پیش کی۔

اس سے قبل قومی اسمبلی کا اجلاس ڈپٹی سپیکر کی زیر صدارت ہوا،اجلاس میں شروع ہوا تو اپوزیشن نے واک آؤٹ کردیا ،اپوزیشن ارکان واپس آئے تو سپیکر کے وزیردفاع کو مائیک دینے پر دوبارہ تنازع شروع ہوگیا،اپوزیشن نے ہنگامہ کردیا ،نعرے بازی کی ۔

ضرورپڑھیں:وزیردفاع کو مائیک دینے پر اپوزیشن کاقومی اسمبلی میں ہنگامہ ،ایسا کوئی فیصلہ نہیں کرینگے جو متنازعہ ہو،خواجہ آصف

 قومی اسمبلی میں اظہار خیال کرتے ہوئے وزیردفاع خواجہ محمد آصف نے کہا ہے کہ میں بولوں گا،کوئی نہیں روک سکتا،ایوان میں بلیک میلنگ نہیں چلے گی۔اقلیتوں کا ملک میں رہنے کا برابر حق ہے،اپوزیشن جو مسئلہ اٹھانا چاہتی ہے،اسکا بھی جواب دونگا۔

 (24 نیوز)قومی اسمبلی اجلاس میں کراچی کی لوڈشیڈنگ پر احتجاج ،وزیرمملکت برائے خزانہ نے 10گھنٹے لوڈشیڈنگ ثابت کرنے پر استعفیٰ دینے کی پیشکش کردی ۔

قومی اسمبلی کا اجلاس ڈپٹی اسپیکر سید میر غلام مصطفیٰ شاہ کی صدارت میں ہوا، چیئرمین سینیٹ یوسف رضا گیلانی اسپیکر گیلری آئے اور ایوان کی کارروائی دیکھی۔پیپلزپارٹی کے چیئرمین بلاول بھٹو زرداری کی ایوان میں آمد کے موقع پر پارٹی اراکین نے ڈیسک بجا کر استقبال کیا، علی قاسم گیلانی نے بحیثیتِ رکن قومی اسمبلی حلف اٹھایا۔

اجلاس کے دوران کراچی میں کے الیکٹرک کی جانب سے طویل لوڈشیڈنگ اور اوور بلنگ پر توجہ دلاؤ نوٹس ایوان میں پیش کیا گیا، پیپلز پارٹی کے رکن نبیل گبول نے کے الیکٹرک پر تنقید کرتے ہوئے کہا کہ لیاری میں دو دو دن بجلی بند رہتی ہے، کراچی کربلا بنا ہوا ہے، مسئلہ سول نافرمانی کی طرف جارہا ہے۔

انہوں نے وزیر مملکت خزانہ علی پرویز ملک کو چیلنج کرتے ہوئے کہا کہ بل دینے والے اور نہ دینے والوں کو ایک ہی سزا مل رہی ہے، 10 گھنٹے کی لوڈشیڈنگ ثابت ہوئی تو اپنااستعفیٰ دیں گے، اگر میں غلط ثابت ہوا تو میں استعفیٰ دوں گا۔

ضرورپڑھیں:عمران خان کوموت کی کوٹھڑی میں رکھا گیا ہے،پی ٹی آئی رہنماؤں نے سہولیات کی تردید کردی

وزیر مملکت خزانہ علی پرویز ملک نے کہا کہ کے الیکٹرک میں 2109 فیڈرز موجود ہیں، اراکین کو انفرادی طور پر نقصان والے فیڈرز کا ڈیٹا دے دیا جائے گا،پیپلز پارٹی کے رکن مرزا اختیار بیگ نے کہا کہ ہم کسی کو نیٹ میٹرنگ کو ختم نہیں کرنے دیں گے ، غریب لوگوں نے اپنی جمع پونجی لگا کر سولر سسٹم لگوایا ہے، سولہ سولہ گھنٹے لوڈ شیڈنگ ہورہی ہے۔وزیر مملکت علی پرویز ملک نے جواب دیا کہ نیٹ میٹرنگ کے سسٹم میں کوئی تبدیلی نہیں آرہی۔

پیپلز پارٹی کے رکن آغا رفیع اللہ نے کہا کہ ہم کے الیکٹرک کا معاملہ کافی عرصہ سے اسمبلی میں لیکر آرہے ہیں۔رہنما پیپلز پارٹی شازیہ مری نے کہا کہ سندھ میں 20 20 گھنٹے لوڈشیڈنگ ہے، بھاری بھرکم بل آتےہیں لیکن بجلی نہیں ہے، لوگ گرمی کی شدت سےتڑپ رہے ہیں لیکن کوئی جواب دینے والا نہیں۔

خواجہ شیراز نے کہا کہ ہمارا علاقہ ڈاکوؤں کے نرغے میں ہے، ڈیرہ غازی خان ڈویژن سے ڈاکو لوگوں کو اغوا کررہے ہیں ، جب تک تاوان نہ دیا جائے کچے کے ڈاکو غریب لوگوں کو رہا نہیں کرتے، اس ایوان کے توسط سے اپنے اداروں کو کہنا چاہ رہا ہوں ہمارے جان ومال کا تحفظ کیاجائے، ایک طرف ہم دہشت گردی کا شکار ہیں۔تین مرتبہ چیک پوسٹوں پر حملے ہوئے ہیں، وفاقی وزیر داخلہ سے ذمہ داری واپس لے کر وزیر کھیل بنا دیں، جب وزارت داخلہ سوئی ہوئی ہے پھر ہم کس سے پوچھیں۔

ضرورپڑھیں:عمران خان کوموت کی کوٹھڑی میں رکھا گیا ہے،پی ٹی آئی رہنماؤں نے سہولیات کی تردید کردی

علی قاسم گیلانی نے اظہارخیال کرتے ہوئے کہا کہ جس سیٹ پرمیں بیٹھا ہوں یہ میرے والد کی سیٹ ہے، ملتان کی عوام نے نفرت اورتقسیم کی سیاست کو مسترد کیا۔علی قاسم گیلانی نے اپنی تقریرمیں جنوبی پنجاب کو صوبہ بنانے کا مطالبہ کیا، انہوں نے کہا کہ نوجوانوں کواس بجٹ میں امید دینے کی ضرورت ہے، فلسطین کے مسلمانوں اور غزہ کے بچوں کو نہیں بھولنا چاہیے۔

قبل ازیں قومی اسمبلی اجلاس کا 5 نکاتی ایجنڈا جاری کیا گیا تھا، وقفہ سوالات، کے الیکٹرک کی طرف سے لوڈ شیڈنگ کے بارے میں توجہ دلاؤ نوٹس، صدر مملکت کے مشترکہ اجلاس سے خطاب بھی ایجنڈے میں شامل تھا۔اس کے علاوہ یورپی یونین، برطانیہ کی پی آئی اے پروازوں پرپابندی پر توجہ دلاؤ نوٹس بھی قومی اسمبلی اجلاس کے ایجنڈے میں شامل تھا۔

(عثمان خان)قومی اسمبلی کی راہداریوں میں ٹک ٹاکرز ، یو ٹیوبرز اور میڈیا کی طرف سے ویڈیو بنانے پر پابندی عائد،مسلم لیگ ق کے طارق بشیر چیمہ کے رواں سیشن میں ایوان میں داخلے کو بین کردیا گیا۔

 قومی اسمبلی کا اجلاس اسپیکر سردار ایاز صادق کی صدارت میں  ہوا،وزیر دفاع خواجہ محمد آصف  نے اظہار خیال کرتے ہوئے کہا ہے کہ آپ یہاں دروازے سے نکلیں تو چالیس پچاس بندے کھڑے ہوتے ہیں ،میرا خدشہ سیکیورٹی سے متعلق ہے ،نوے کی دہائی میں کوئی ایم این اے مخصوص کارڈ جاری کراسکتا تھا ،داسو کے اندر جو واقعہ ہوا وہ دس دن پاکستان کے اندر رہی 
یہاں پر کوئی بھی اندر آسکتا ہے ۔
اس دن ایک پارٹی کے سو سے زائد لوگ گیلری میں بیٹھے ہوئے تھے ،سیکیورٹی سٹاف سے درخواست ہے کم از کم تعداد میں لوگوں کو آنے دیں،نہ یہ موچی دروازہ ہے نہ ڈی چوک ہے کہ لوگوں کو یہاں لائیں،پہلے بھی آپ کو بتا چکا ہوں کل بھی آپ کو پیغام بھیجا ،میں گیٹ پہ ٹک ٹاکرز اور سوشل میڈیا انفلوئنسرز کھڑے ہوتے ہیں۔

ضرورپڑھیں:ہر یونین کونسل میں شناختی کارڈکی سہولت، بائیومیٹرک مشینیں نصب ہوں گی،محسن نقوی نے نادرا کو مزید متحرک کردیا

سپیکر ایاز صادق  نے کہا ہے کہ کل قومی اسمبلی ایوان میں ایک انتہائی افسوس ناک واقعہ ہوا،مسلم لیگ ق کے طارق بشیر چیمہ کے رواں سیشن میں ایوان میں داخلے پر پابندی لگادی گئی،سپیکر نے تحریک کے ذریعے ایوان سے منظوری لے لی ۔طارق بشیر چیمہ نے سنی اتحاد کونسل کی رکن زرتاج گل کو ایوان میں گالی دی تھی۔
اسپیکر قومی اسمبلی  نے رولنگ دی کہ  قومی اسمبلی کی راہداریوں میں ٹک ٹاکرز ، یو ٹیوبرز اور میڈیا کی طرف سے ویڈیو بنانے پر پابندی عائد ہو گی، قومی اسمبلی کا اجلاس غیر معینہ مدت تک ملتوی کردیا گیا۔

(24نیوز)چیئرمین پیپلز پارٹی بلاول بھٹو نے کہا ہے کہ اپوزیشن لیڈرکی تقریررونے دھونے کے سواکچھ نہیں ،اپوزیشن اپنی ذمہ داری بھول چکی ہے۔چیئرمین بلاول بھٹو کاقومی اسمبلی میں اپوزیشن کوحکومت سے ڈائیلاگ کامشورہ ،کہتے ہیں کہ اپوزیشن کی تنخواہ تب حلال ہوگی جب وہ پارلیمنٹ میں مثبت کرداراداکرے ۔بلاول بھٹونے کہا صدر زرداری کی تقریرشارٹ اینڈسویٹ تھی۔انہوں نے صرف ملک وقوم کی بات کی۔ڈائیلاگ کی بات انہوں نے ذاتی مفاد کیلئے نہیں کی۔

قومی اسمبلی اجلاس میں خطاب کے دوران ان کا کہنا تھا کہ پاکستان کی تاریخ میں پہلی بار ہوا کہ سویلین صدر نے اس ایوان میں ساتویں بات خطاب کیا، صدر زرداری نے کوئی سیاسی یا ذاتی بات نہیں کی بلکہ انہوں نے واضح کیا کہ وہ وفاق اور عوام کی نمائندگی کرتے ہوئے ان کے مسائل کو ترجیح دیتے ہیں، انہوں نے تقریر میں اتحاد کی بات کی، ڈائیلاگ کی بات کی، یہ سب اپنی ذاتی مفاد کے لیے نہیں کیا وہ اس لیے کیونکہ وہ سمجھتے ہیں کہ اگر پاکستان کے مسائل جیسے غربت،مہنگائی جیسے مسائل کا حل نکالنا ہے تو سیاسی پروسس، ڈائیلاگ کے بغیر یہ نا ممکن ہے۔

بلاول بھٹو نے بتایا کہ اپوزیشن کی ذمہ داری ہے کہ ناصرف اپنے ذاتی مسائل پر رونا دھونا کرے بلکہ پاکستان کے عوام پر بھی بات کریں،جہاں ان کا حق وہ جمہوری انداز میں احتجاج کریں لیکن عوام کے مسائل کے حل کے لیے کام کرنا ان کا فرض ہے، میں بجٹ پر اپوزیشن اور حکومت کو تجویز دوں گا کہ اپوزیشن کا اس میں ان پٹ ہونا چاہیے، جب پاکستان معاشی بحران سے گزر رہا ہے تو شاید اپوزیشن اپنی ذمہ داری بھول گئے ہیں تو ہم ان کو یاد دلائیں کہ جو پیسے ان کو ایوان سے مل رہے ہیں وہ اس کو حلال کریں، بجٹ اور پارلیمان میں اپنا کردار ادا کریں۔

ان کا کہنا تھا کہ صدر زرداری کی تقریر تو بہت چھوٹی تھی مگر قائد حزب اختلاف کی تقریر ایک گھنٹے کی تھی جس میں 90 فیصد انہوں نے اپنا رونا دھونا کیا، اپنے بہادر خان صاحب کا رونا دھونا کیا جو دو تین مہینے جیل میں رہ کر تنگ آگئے ہیں، اور جو ان کی ذمہ داری بحیثیت قائد حزب اختلاف کے عوام کے مسائل کو اٹھائیں انہوں نے یہ ذمہ داری پوری نہیں کی۔

بلاول بھٹو کے مطابق صدر زرداری نے تقریر میں صحت اور تعلیم کے شعبے کی بات کی، پیپلز پارٹی کی سندھ حکومت نے دونوں شعبوں میں تاریخی کام کیا، ہم نے کراچی سمیت تمام بڑے شہروں میں دل کے مفت ہسپتال کھولے، انہوں نے تعلیم کے حوالے سے بھی تقریر میں ذکر کیا اس میں بھی ہم نے کوشش کی کہ تعلیم میں اسٹرکچرل مسئلے ہیں ان کو حل کرنے کے لیے بہت کام کروائے جو کامیاب ہوئے ہیں۔

سابق وفاقی وزیر نے بتایا کہ صدر زرادری نے ملک کے اندر عوامی مسائل پر بات کی مگر ساتھ ساتھ پاکستان کا جو مؤقف ہے کشمیر اور فلسطین کے مسئلے پر اس کو بیان کیا، میں مذمت کرنا چاہوں گا کہ جس وقت صدر اس ایوان میں کشمیر اور فلسطین پالیسی کو پاکستان کے سامنے رکھ رہے تھے مگر جو غیر ملکی سفارتکار تھے ان کے سامنے بیان کر رہے تھے تو اپوزیشن والے سیٹیاں بجا رہے تھے، شور شرابہ کر رہے تھے تو وہ کیا پیغام بھیج رہے تھے سب کو؟ کیا ان کا ذاتی رونا دھونا پاکستان کے مسائل سے زیادہ اہم ہے؟ وہ اپنے مسئلوں کو ترجیح دیتے ہیں ان اہم مسئلوں کو ترجیح نہیں دیتے۔

ضرورپڑھیں:وزیراعلیٰ نے گورنرکےپی کی خیبرپختونخوا ہاؤس آمدپر پابندی لگادی

بلاول بھٹو نے کہا کہ آزاد کمشیر میں جو مسئلہ چل رہا تھا اس پر صدرزرداری کا شکر گزار ہوں کہ انہوں نے جلد اس بات کا نوٹس لیا اور میں حکومت وقت کا بھی شکرگزار ہوں کہ انہوں نے مطالبات مانتے ہوئے کشمیر پیکج کا اعلان کیا، اس وقت پاکستان کے کسان سندھ اور پنجاب میں سراپا احتجاج ہیں اور ہم سب جماعتوں کا منشور ہے کہ پاکستان کی زراعت اس ملک کی معیشت کی ریڑھ کی ہڈی ہے، اگر کشمیر ہماری شہ رگ ہے تو ہمارے ملک کی شہ رگ کسان ہیں، اس معاملے پر سب سیاسی جماعتوں کو ایک پیج پر ہونا چاہیے، جو کسان کا معاشی قتل جاری ہے اس کا احتساب ہونا چاہیے کہ جو عبوری حکومت میں فیصلہ لیا گیا اور پاکستان کی عوام کا پیسہ دوسرے ممالک کو دیا گیا اور گندم درآمد کروائی گئی تو اس ے معیشت کو نقصان ہوا اور پیسہ ضائع ہوا اور ان کا نقصان آگے جا کر ہوگا۔

یہ بھی پڑھیں:کوئی پگڑی اچھالے گا تو ہم ان کی پگڑیوں کی فٹبال بنائیں گے: فیصل واڈا

ان کا کہنا تھا کہ ہم حکومت وقت سے درخواست کرتے ہیں کہ کمیٹی کمیٹی کھیلنا بند کریں، اگر ہم معاشی ترقی چاہتے ہیں، اگر کسانوں کو ترقی کرتے دیکھنا چاہتے ہیں تو کل نہیں آج یکشن لینا پڑے گا، اب حکومت کو فیصلہ لینا چاہیے اس میں دیر نہیں ہونا چاہیے یہ مانتے ہوئے کہ یہ نقصان کسانوں کو اپنی وجہ سے یا دنیا کے معاشی حالات کی وجہ سے نہیں ہوئے لیکن یہ نقصان نالائق، غیر جمہوری لوگوں کے فیصلے کی وجہ سے ہورہا ہے، حکومت کو فورا کسانوں کی مدد کا فیصلہ کرنا چاہیے، ایکسپورٹ پر پابندی ہٹائی جائے تاکہ کسان بھی کما سکے اور معیشت کو بھی فائدہ ہو۔

گزشتہ روز کی کارروائی یہاں پڑھئے 

بلاول بھٹو نے کہا کہ فلسطین میں ظلم ہورہا ہے، وہاں گندم بھیجی جائے مگر پاکستان کے کسانوں سے گندم خریدیں اور ان پر ظلم بند کیا جائے، ان فیصلوں کی وجہ سے یہ نا ہو کہ اگلے سال کسان کم فصل پیدا کرے، ہم سب مانتے ہیں کہ زراعت ریڑھ کی ہڈی ہے تو حکومت جو بجٹ پیش کرے گی اس میں ایک ایسا پیکج دے گی کہ سب مانیں کہ یہ ایک زراعی ملک ہے۔ اپوزیشن کے جو دوست ہیں ان کا جو غیر سنجیدہ رویہ ہے میں اس پر افسوس کا اظہار کرنا چاہتا ہوں، میں شروع کروں تو کہاں سے کروں؟ یہ آج کل کچھ پریشان ہیں، پیپلزپارٹی تین نسلوں سے جموہریت کی بحالی کے لیے جدو جہد کیے جارہے ہیں اور ان سالوں میں انہی لوگوں نے ہماری مخالفت کی۔

بلاول نے کہا یہ بات ایک کرتے ہیں اور سیاست ان کی کچھ اور ہے، بطور ان کے یہ آئین کی بالا دستی، حقیقی آزادی، قانون کے لیے جدو جہد کر رہے ہیں مگر بات کرنی ہے تو صرف افواج اور اسٹیبلشمنٹ سے، پاؤں اگر کسی کا پکڑا ہوا ہے تو انہی کا پکڑا ہوا ہے، بات ایک کرتے ہیں، سیاست ایک کرتے ہیں، اصل میں وہ نا جمہوریت نا آئین کی بالا دستی میں دلچسپی رکھتے ہیں، وہ صرف اپنی ذاتی مسئلوں پر یقین رکھتے ہیں، یہ عوام کے مسائل کا حل نہیں چاہتے صرف اور صرف وہ اپنے ذاتی مسائل کا حل چاتا ہیں اور وہ جانتے ہیں کہ کس کا پاؤں پکڑنا پڑے گا تو اس لیے وہ سیاستدانوں کو انکار کر رہے ہیں کہ آپ سے بات نہیں کریں گے لیکن آئین کی بالادستی کے لیے انہی سے بات کرتے ہیں جن کو قائد حزب اختلاف کہہ رہا تھا کہ سیاست میں مداخلت نا کرو، وہ انہی سے پاؤں پکڑ کے زبردستی مداخلت کروا رہے ہیں، یہ غیر سنجیدہ ہیں، یہ منافقت کی سیاست ہے۔

بلاول بھٹو کے مطابق یہ جمہوریت، پارلیمان  کے ساتھ منافقت ہے، جب تک یہ منافقت جاری ہے ان کا رونا دھونا جاری رہے گا،ان کا لیڈر رو رہا ہے ،مجھے نکالو ۔

(24 نیوز)چیئرمین پی ٹی آئی بیرسٹر گوہر علی خان  نے کہا ہے کہ جو کرپٹ سسٹم کے بینیفشری ہیں وہ اسی قسم کا رویہ رکھتے ہیں جو کل خواجہ آصف نے کیا۔

 قومی اسمبلی اجلاس میں اظہار خیال کرتے ہوئے ان کا کہنا تھا کہ جو کرپٹ سسٹم کے بینیفشری ہیں وہ اسی قسم کا رویہ رکھتے ہیں جو کل خواجہ آصف نے کیا،انہوں نے ہمارے رکن کے بارے میں جو کہا اس کو حذف کریں،بیرسٹر گوہر کی تقریر کے دوران طارق بشیر چیمہ نےلقمہ دیا تو بیرسٹر گوہر نےطارق بشیر چیمہ کو جواب دیا کہ آپ ہارے ہوئے ہیں، ڈان لیکس والے آپ تھے،پانامہ والے آپ تھے،آپ کے صدر کے خلاف میموگیٹ والے یہ تھے۔

ضرورپڑھیں:قومی اسمبلی اجلاس:ماحول کے ساتھ تقاریر میں بھی گرمی،اپوزیشن ارکان کا خواجہ آصف کو کرارا جواب

انہوں نے کہا ہے کہ آج بھی نواز شریف اور شہباز شریف کے پاس اکثریت نہیں،نواز شریف نے ان لوگوں کو پیچھے دیکھ کر مبارکباد نہیں دی. کیونکہ یہ سب ہارے ہوئے ہیں،جمہوریت مساوات اس کے لیے تحریک انصاف آگے بڑھ رہی ہے،یہ خواجہ آصف تو اقامہ والے ہیں،کیا فری اینڈ فیئر الیکشن  یہ تھا ،یہ طریقہ کار تھا جو الیکشن کمیشن نے کیا،خان جو خود کہہ رہا ہے کہ میرے ساتھ جو زیادتیاں ہوئی ہیں وہ معاف کرنے کو تیار ہوں۔

ان کا کہنا تھا کہ آپ نے نشان بھی لیا لیکن پھر بھی عوام نے ساتھ نہیں چھوڑا،اس کے باوجود کہ زیادتیاں ہوئیں ہم اس پارلیمان کا حصہ بنے،ہم  استعفوں کی طرف نہیں گئے،کل ہم نے ذاتی وضاحت کے لیے مائیک کی درخواست دی پینل آف چیئر نے مائیک نہیں دیا، قوم عوام اور ملک. کی. خاطر آگے. بڑھنا چاہتے ہیں۔

(24 نیوز)وفاقی وزیر اطلاعات عطا تارڑ نے کہا ہے کہ وزیر اعظم شہباز شریف کے اقدامات سے دشمن کی سازش ناکام ہوگئی۔

اسلام آباد میں میڈیا سے گفتگو کرتے ہوئے ان کا کہنا تھا کہ تحریک انتشار یہ سوچ رکھتی ہے کہ کسی نہ کسی طرح انتشار پھیلے، ماضی کی نااہل حکومت اور ہماری حکومت میں زمین آسمان کا فرق ہے، ہماری حکومت کا کام زخموں پر مرہم رکھنا ہے۔وزیراعظم کے بروقت نوٹس نے ہمیں ایک سانحے سے بچالیا، جس کی وجہ سے دشمن کی سازش ناکام ہوگئی، کل جب وزیراعظم شہباز شریف نے بلا امتیاز طور پر تمام اسٹیک ہولڈرز کو بلایا تو وفاق کے اعلیٰ عہدیداران اور اتحادی جماعتوں کے نمائندگان موجود تھے جن کے ساتھ مل کر آزاد کشمیر میں مظاہرین کے مسائل کے حل کے لیے فوری اقدامات کیے گئے، میں سمجھتا ہوں یہ حکومت کی کامیابی ہے کہ کیس بڑے نقصان کے بغیر آزاد کمشیر میں ہڑتال ختم ہوئی اور مظاہرین منتشر ہوگئے۔

ضرور پڑھیں:قومی اسمبلی اجلاس :ماحول کے ساتھ تقاریر میں بھی گرمی،اراکین میں نوک جھونک 

عطا تارڑ نے کہا ہے کہ  یہی وہ فیصلہ سازی ہے جو حکومتوں کو کرنا چاہیے، ماضی کی حکومتیں ایسا نہیں کرتی تھیں۔ماضی کی حکومتیں اس نوعیت کے مسائل حل کرنے میں ناکام رہی، ہزارہ کمیونٹی کی مثال ہمارے سامنے ہے کہ ان کی لاشیں رکھے بیٹھے رہے لیکن وزیراعظم بصد تھے کہ وہاں نہیں جائیں گے، یہی فرق ہے اس نااہل اور عوام کی منتخب حکومت میں کہ اب گھنٹوں میں معاملات حل ہو جاتے ہیں۔

وفاقی وزیر اطلاعات نے مزید کہا کہ مہنگائی میں کمی، اسٹاک ایکسچیج کی کارکردگی بہتر ہورہی ہے، بین الاقوامی وفود آرہے ہیں اور ملک میں سرمایہ کاری کی بات کررہے ہیں تو یہ باتیں ملک دشمن عناصر کو ہضم نہیں ہورہیں اور وہ گھر کے اندر سازش کرتے ہیں جو ناکام ہر گئی ہیں۔ جیل سے باتیں کرنے والے کو اپنی کرپشن کا جواب دینا چاہیے، آپ قیدی ہیں سزا یافتہ ملزم ہیں تو آپ کے قول، خط اور فعل کسی کی وقعت نہیں، آپ نے آئی ایم ایف اور دیگر معاملات میں ملک کو نقصان پہنچانے کی کوشش کی۔

انہوں نے مزید کہا کہ ہم پاکستان کی ترقی کی خاطر ہر قدم اٹھائیں گے اور ملک دشمن عناصر کو کامیاب نہیں ہونے دیں گے، آزاد کشمیر میں انتشار پھیلانے والوں کو معافی مانگنی چاہیے۔کشمیر ہماری شہ رگ ہے اور کسی کو اس کی طرف میلی آنکھ سے دیکھنے نہیں دیں گے اور سازش کرنے والوں کو ناکام بنائیں گے۔

اس موقع پر وفاقی وزیر امیر مقام نے کہا کہ جنہوں نے یہ سازش کی وہ چاہتے تھے کہ مظاہرے ہون گے تو لاشیں گریں گی لیکن وہ بری طرح ناکام ہوئے ہیں۔

(24نیوز)اسپیکر ایازصادق کی زیرصدارت قومی اسمبلی کےاجلاس میں وزیرقانون اعظم نذیرتارڑ کا کہنا تھا کہ دہشتگردوں سے کوئی مذاکرات نہیں ہونگے۔

 وزیرقانون اعظم نذیرتارڑ نے کہا کہ حکومت کی زیروٹالرنس پالیسی ہے،دہشتگردوں سے ان ہی کی زبان میں بات ہوگی،ہزاروں کی تعداد میں دہشتگردوں کو لاکر آباد کیا گیا،دہشتگردوں کو اینٹ کا جواب پتھر سے دیاجائیگا۔

صدف احسان کے حلف اٹھانے پر اپوزیشن نے شور شرابا شروع کر دیا، جےیوآئی کے رکن قومی اسمبلی نورعالم خان نے کہا صدف احسان حلف نہیں لے سکتیں، یہ ہماری پارٹی کی ممبر نہیں، پارٹی نے ان کو ڈی نوٹیفکیشن کردیا تھا، آپ نے ان سے حلف لے کر غیرقانونی وغیرآئینی کام کیا، اسپیکرقومی اسمبلی نے کہا الیکشن کمیشن سے صدف احسان کا نوٹیفکیشن ہوچکاہے، نورعالم خان نے قومی اسمبلی میں کورم پورا نہ ہونے کی نشاندہی بھی کی۔

  اجلاس میں اپوزیشن لیڈر عمر ایوب  نے اظہار خیال کیا تو اپوزیشن لیڈر کی تقریر کے دوران حکومتی ارکانے شورشرابا شروع کر دیا،عمر ایوب کا کہنا تھا کہ ملک میں آئین اور قانون کی حکمرانی کا فقدان ہے۔

(روزینہ علی)صدرمملکت آصف علی زرداری نے کہا ہے کہ آج کے دن کو ایک نئی شروعات کے طور پر دیکھیں،اب ہمارے پاس ضائع کرنے کیلئے وقت نہیں ہے،ملک کو آگے لے جانے کیلئے تقسیم ختم کرنا ہوگی،چیلنجز کو مواقع میں تبدیل کرنا ہوگا۔

صدرآصف زرداری کا دوسری بار صدر منتخب ہونے پر تمام ارکان سے اظہار تشکر،خطاب میں کہا کہ ماضی میں بطور صدر میرے فیصلوں نے تاریخ رقم کی،ملک میں آج دانشمندی اور پختگی کی ضرورت ہے،ملک کو درپیش چیلنجز پر قابو پانا ناممکن نہیں۔

انہوں نے کہا ہے کہ تمام لوگوں اور صوبوں سے قانون کے مطابق یکساں سلوک ہونا چاہیے،ہمارا ایجنڈا اور خیالات ہی ملک کو مضبوط بنائیں گے،ہمیں ہنگامی اور مثبت اقدامات کرنا ہوں گے،ایسا سیاسی ماحول بنانا ہوگا جس میں سب کی ضرورت پوری کی جاسکے،اختلافات کو ختم کرنا ہوگا،صوبوں کے درمیان تعلقات کو بہتر بنانا ہوگا،ایسا سیاسی ماحول بنانا ہوگا جس میں حدت کم اور روشنی زیادہ ہو۔
ان کا کہنا تھا کہ بین الاقوامی منڈی میں جگہ بنانے کیلئے برآمدات کو ترجیح دینا ہوگی،ہمیں ماحول دوست انفرااسٹرکچر بنانا ہوگا،بیرون ممالک سے سرمایہ کاری لانا ہوگی،بچوں کی بڑی تعداد اسکولوں سے باہر ہے،پاکستان کے پاس خوراک کی کمی ہے،صحت کے شعبہ میں سرمایہ کاری کی ضرورت ہے،ہم دہشت گرد عناصر کو ختم کریں گے، ملک کو سیاسی بحران سے نکالنے کی ضرورت ہے،معیشت کی بحالی کیلئے سب کو حصہ ڈالنا ہوگا۔
ان کا کہنا تھا کہ آج کے دن کو ایک نئی شروعات کے طور پر دیکھیں،اب ہمارے پاس ضائع کرنے کیلئے وقت نہیں ہے،ملک کو آگے لے جانے کیلئے تقسیم ختم کرنا ہوگی،چیلنجز کو مواقع میں تبدیل کرنا ہوگا۔

 اپوزیشن کا شورشرابہ،پیپلزپارٹی ارکان کے ''ایک زرداری سب پر بھاری ''کے نعرے

صدرمملکت کے خطاب کے دوران اپوزیشن کا شورشرابہ،پیپلزپارٹی ارکان کے ''ایک زرداری سب پر بھاری ''کے نعرے،وزیراعظم شہباز شریف ،وزیرداخلہ محسن نقوی ایوان میں موجود،چیئرمین سینیٹ یوسف رضا گیلانی ،بلاول بھٹو، آصفہ بھٹو،وزیراعلیٰ سندھ سید مراد علی شاہ، وزیراعلیٰ بلوچستان سرفرازبگٹی ایوان میں موجود ہیں،مشترکہ اجلاس میں چین اور برطانیہ کے سفیر بھی شریک ہیں۔

سابق وزیراعظم نوازشریف ،وزیراعلیٰ پنجاب مریم نواز،وزیراعلیٰ خیبرپختونخواعلی امین گنڈا پور مشترکہ اجلاس میں صدرمملکت کا خطاب سننے کیلئے موجود نہیں ہیں۔

پارلیمنٹ کے مشترکہ اجلاس کے موقع پر سیکیورٹی کے خصوصی انتظامات کیے گئے ہیں۔پارلیمنٹ کے مشترکہ اجلاس میں چیف جسٹس آف پاکستان، صوبائی گورنرز اور وزرائے اعلیٰ کو شرکت کے دعوت نامے جاری کیے گئے ۔مشترکہ اجلاس میں شرکت کے لیے چیئرمین جوائنٹ چیف آف اسٹاف کمیٹی سمیت تینوں سروسز چیفس کو بھی خصوصی دعوت دی گئی ۔

ضرورپڑھیں:معاشی گرداب سے نکلنے کی نئی تدبیریں،کیا کامیابی ملے گی؟

مشترکہ اجلاس میں وزیر اعظم آزاد کشمیر، گورنر اور وزیر اعلیٰ گلگت بلتستان کو بھی خصوصی طور پر مدعو کیا گیا ہے،مشترکہ اجلاس میں چاروں صوبائی اسپیکرز، اسپیکر آزاد جموں کشمیر اور اسپیکر گلگت بلتستان قانون ساز اسمبلی کو بھی شرکت کی دعوت دی گئی ہے،مشترکہ اجلاس کی کوریج کے لیے میڈیا کے نمائندوں کو بھی خصوصی دعوت نامے جاری کیے گئے ہیں۔

مشترکہ اجلاس کے موقع پر پارلیمنٹ ہاؤس میں داخلے کے لئے خصوصی دعوت نامے کا ہونا ضروری ہے،بغیر خصوصی دعوت نامے کے پارلیمنٹ ہاؤس کے احاطے میں داخلہ ممکن نہیں ہو گا۔

(روزینہ علی) قومی اسمبلی کے ہنگامہ خیز اجلاس میں وفاقی وزیرقانون نے سات آرڈیننس کی مدت میں توسیع کی قرارداد پیش کر دی،اپوزیشن کے ہنگامے میں قرارداد منظور کرلی گئی ۔

قومی اسمبلی کا اجلاس سپیکر سردارایاز صادق کی صدارت میں جاری ہے۔ایجنڈے کے تحت اجلاس میں وزیر قانون نے سات آرڈیننسز کی مدت میں توسیع کی قرارداد پیش کی۔ قرارداد کی حمایت میں 138 ووٹ اور مخالفت میں 63 ووٹ  آئے۔

پی پی رکن نوید قمر نے کہا کہ ہم اس قرارداد کو منظور کروانے میں ساتھ ہیں مگر احتیاط ہونی چاہئے،ایسی کوئی چیز نہیں ہونی چاہیے جو قابل واپسی نہ ہو،وزیر قانون کی وضاحت کے دوران سنی اتحاد کونسل ارکان کے کاغذات پھاڑ کر پھینکنے پہ اسپیکر برہم ہوگئے۔اسپیکر ایاز صادق نے کہا کہ اگر اب ایسا کیا تو انضباطی کارروائی پہ مجبور ہوں گا۔

’آئی ایم ایف اور یورپی یونین کو خط لکھنے سے کچھ نہیں ہوگا‘

وفاقی وزیر قانون اعظم نذیر تارڑ نے خطاب کرتے ہوئے کہا ہے کہ ہم تمام اتحادیوں کی رائے لیں گے،ہم پرانے آرڈیننس کی توسیع کے بعد قوانین بناتے ہوئے ایوان کو اعتماد میں لیں گے،وزیراعظم نے ہدایت جاری کی ہے کہ اس پر کمیٹی بنا دی جائے،کمیٹی میں اپوزیشن سمیت تمام پارٹیز کی نمائندگی ہوگی،اپوزیشن کو بھی کہتا ہوں کہ یہ ملک دشمنی چھوڑنا پڑے گی،آئی ایم ایف اور یورپی یونین کو خط لکھنے سے کچھ نہیں ہوگا۔

 سید نوید قمر بولے کہ کچھ ارڈیننسز پر ہمیں شدید تشویش ہے،اگر ایسے ہی منظوری کروانی ہے تو پھر گھر سے بیٹھ کر کرا لیں۔

سنی اتحاد کونسل کے رکن اسد قیصر بولے کہ شہباز شریف صاحب جب اپوزیشن لیڈر تھے تو گھنٹوں بات کرتے تھے، عمر ایوب اپوزیشن لیڈر ہیں اور ان کو بات نہیں کرنے دی جاتی،سید نوید قمر صاحب آپ کہتے تھے کہ ہم قانون اور رولز کے خلاف نہیں جائیں گے،آج آپ بھی ایوان میں موجود ہیں اور یہاں کیا ہو رہا ہے۔سپیکرنے جواب دیا کہ وہ ابھی اپوزیشن لیڈر نہیں ہوئے سکروٹنی کا عمل جاری ہے۔

(24 نیوز)سنی اتحاد کونسل کے عمر ایوب کا کہنا ہے کہ میرے قائد عمران خان کو بطور سیاسی قیدی گرفتار کر رکھا ہے، 9 مئی کو ہمارے معصوم لوگوں کو گولی مار کر شہید کر دیا گیا، ہم مطالبہ کرتے ہیں کہ غیر جانبدارانہ انکوائری ہونی چاہیے۔

قومی اسمبلی کے خصوصی اجلاس میں اظہار خیال کرتے ہوئے عمر ایوب نے کہا کہ ہمارے وائس چیئرمین اور صدر سیاسی قیدی ہیں، پی ٹی آئی کی خواتین اور کارکنان سیاسی قیدی ہیں، میرا مطالبہ ہے کہ بشریٰ بی بی کو مناسب سہولیات فراہم کی جائیں۔میرے قائد کو بطور سیاسی قیدی گرفتار کر رکھا ہے، تحریک انصاف 9 مئی کے واقعات کی ذمہ دار نہیں، اس دن ہمارے معصوم لوگوں کو گولی مار کر شہید کر دیا گیا، پنجاب اور خیبر پختونخوا کی غیر آئینی نگران حکومتوں نے ہمارے 10 ہزار افراد کو گرفتار کیا، نگران حکومتوں نے جو کیا اس پر آرٹیکل 6 لگنا چاہیے اور ہم مطالبہ کرتے ہیں کہ 9 مئی کے واقعات کی غیر جانبدارانہ انکوائری ہونی چاہیے۔

عمر ایوب کے خطاب کے دوران نومنتخب وزیر اعظم شہباز شریف پارلیمنٹ ہاؤس سے روانہ ہوگئے۔عمر ایوب نے اپنا خطاب جاری رکھتے ہوئے کہا کہ سرکاری ٹی وی ایوان سے میرا خطاب لائیو نہیں دکھا رہا، اسپیکر قومی اسمبلی میرا خطاب لائیو دکھانے کی رولنگ دیں۔

ضرورپڑھیں:بیرونی قرض ملک کیلئے سب سے بڑا چیلنج ہے،شہباز شریف

اس پر اس وقت اجلاس کی صدارت کرنے والے ڈپٹی اسپیکر نے کہا کہ سرکاری ٹی وی پر اس وقت کمرشل چل رہے ہیں، پی ٹی وی آپ کی تقریر لائیو دکھائے گا۔عمر ایوب نے بات جاری رکھتے ہوئے کہا کہ ہم پر وہ شیل برسائے گئے جن پر لکھا تھا براہ راست نہ فائر کیا جائے، ان کا مسئلہ بانی پی ٹی آئی سےذاتی دشمنی ہے، پختون روایتوں کے برعکس ہمارے گھروں میں چادر و چار دیواری کا تقدس پامال ہوا، میرے گھر 17 بار پولیس نے ریڈ کیا، میرے 16 سال کے بیٹےکو دو بار گرفتار کرنے کی کوشش کی گئی، ہائی کورٹ نے توہین عدالت میں ڈی سی کو سزا سنائی۔

انہوں نے کہا کہ پی ٹی آئی کارکنان کو دوران قید بدترین تشدد کا نشانہ بنایا گیا، کارکنان پر تشدد کر کے پی ٹی آئی چھوڑنے پر مجبور کیا گیا، ملک کی 65 فیصد آبادی 45 سال سے کم عمر ہے، نوجوانوں نے اپنے اہلخانہ کو بدترین تشدد کا نشانہ بنتے دیکھا ہے۔

ان کا کہنا تھا کہ وزیراعظم پہلے ملک میں قانون کی بالادستی کی بات کریں، 3 نومبر 2022 کو ہونے والے سانحے کا ذمہ دار شہباز شریف ہے، وزیر آباد حملے میں پی ٹی آئی کا ایک کارکن شہید ہوا، وزیر آباد حملے میں بانی پی ٹی آئی عمران خان سمیت متعدد کارکنان زخمی ہوئے تھے، وزیر آباد حملے میں تین شوٹرز استعمال ہوئے تھے، بتایا جائے بانی پی ٹی آئی پر حملہ کرنے والا کدھر ہے، خدشہ ہے بانی پی ٹی آئی پر حملہ کرنے والے کو مقصود چپڑاسی کی طرح خاموش نہ کر دیا جائے۔

رہنما پی ٹی آئی نے کہا کہ انتخابات میں آزاد امیدوارقومی اسمبلی کی 180 نشستوں پر کامیاب ہوئے، ہم چھوڑیں گے نہیں، عدالتوں میں جائیں گے۔انٹراپارٹی الیکشن ہمارا اندرونی مسئلہ تھا، انتخابی نشان اس لیے لیا گیا کیونکہ ڈر تھا بانی پی ٹی آئی وزیر اعظم نہ بن جائیں، ملک میں جمہوریت کے حامی ہیں لیکن ایک ملک اور دو دستور نہیں چل سکتے۔

(24 نیوز)نومنتخب وزیراعظم شہباز شریف نے کہا ہے کہ پورے ایوان کو دل کی گہرائیوں سے مبارکباد پیش کرتا ہوں۔کہا کہ بیرونی قرض ملک کیلئے سب سے بڑا چیلنج ہے۔

وزیر اعظم منتخب ہونے کے بعد ایوان میں اپنا پہلا خطاب کرتے ہوئے شہباز شریف کا کہنا تھا کہ آج کی اپنی تقریر اللہ تعالیٰ کے پاک نام سے شروع کرتا ہوں، اسپیکر ، ڈپٹی اسپیکر اور پورے ایوان کو دل کی گہرائیوں سے مبارکباد پیش کرتا ہوں، نواز شریف کو اس منصب پر نامزد کرنے کیلئے مبارکباد پیش کرتا ہوں، بلاول بھٹو ، خالد مقبول صدیقی ، چوہدری شجاعت ، سالک حسین ، عبدالعلیم خان کا شکریہ ادا کرتا ہوں، ان کے ووٹوں اور اپنی محبت سے قائد ایوان منتخب کیا، یہ بات ڈنکے کی چوٹ پر کرنا چاہتا ہوں میرے قائد نوازشریف تین مرتبہ وزیراعظم منتخب ہوئے۔

نو منتخب وزیر اعظم کا کہنا تھا کہ نواز شریف کی لیڈرشپ میں ترقی و خوشحالی کےانقلاب آئے، ترقی و خوشحالی کے انقلاب اپنی مثال آپ ہیں، نوازشریف معمار پاکستان ہیں، لوڈشیڈنگ نواز شریف کے دور میں ختم ہوئی، جس نے پاکستان میں ایٹمی قوت کی بنیاد رکھی، ان کی خدمات کو قوم ہمیشہ یاد رکھے گی، بینظیر بھٹو شہید نے جمہوریت ، قانون ، انصاف کیلئے جان کا نذرانہ پیش کیا، نواز شریف کو ملک میں ترقی و خوشحالی کے مینار تعمیر کرنے کی سزا دی گئی۔

ضرورپڑھیں:میاں محمدشہبازشریف دوسری مرتبہ وزیراعظم پاکستان منتخب

ان کا کہنا تھا کہ نوازشریف اور میری بھتیجی جیل میں گئیں، آصف زرداری کی ہمشیرہ جیل میں گئیں، بینظیربھٹو شہید ہوئیں تو آصف زرداری نے کہا پاکستان کھپے، نوازشریف نے کبھی پاکستان کے مفاد کیخلاف بات کرنا درکنار کبھی پاکستان کے مفاد کیخلاف بات کرنے کا سوچا بھی نہیں، یہ ہے وہ فرق جو قومی قیادت نے پاکستان کی تاریخ میں ادا کیا۔

شہباز شریف کا کہنا تھا کہ ہماری مخالف قیادت نے کیا کیا گرے ہوئے الفاظ استعمال کیے جو زبان پر نہیں لائے جاسکتے، پاکستان کیخلاف زہر اگلا گیا، پاکستان کی افواج کیخلاف زہر اگلا گیا، 2 صوبوں کے وزرائے خزانہ سے کہا آئی ایم ایف کے حوالے سے کوئی مدد نہیں کرنی، اس قیادت اور اس قیادت میں یہ فرق ہے، ہم نے کبھی بدلے کی سیاست کا سوچا بھی نہیں، پاکستان کے مفاد میں صبر ، تحمل اور برداشت سے کام لیا، کبھی کوئی گملہ نہیں ٹوٹا ، کسی بلڈنگ کو نقصان نہیں پہنچا۔

انہوں نے کہا کہ ستم ظریفی کی بات ہے قوم نے وہ دن بھی دیکھا 9 مئی کو اداروں پر حملے کیے گئے، 9 مئی کو جی ایچ کیو اور کورکمانڈر ہاؤس پر حملے کیے گئے، یہ دلخراش واقعہ دیکھی آنکھ سے کبھی نہیں دیکھا تھا، ایک پاکستانی نے کبھی نہیں سوچا تھا، کیا بیتی ہوگی ان شہدا کے ورثا پر، ان ہزاروں گھرانوں میں جن کے پیارے اپنی جان ہتھیلی پر رکھ کر اللہ کو پیارے ہوگئے۔

ان کا کہنا تھا کہ دہشت گردی کے مقابلے میں نوازشریف کا فیصلہ تھاپانی سر سے اونچا ہوگیا، نوازشریف کا فیصلہ تھا اب دہشت گردی کیخلاف متحد ہو جانا چاہیے، کیا یہ بات قابل معافی ہے ، یہ فیصلہ ایوان اور قانون نے کرنا ہے، ہمارے سامنے 2 راستے تھے، ایک راستہ یہ تھا ہم اپنی سیاست بچا لیتےاور آرام سے بیٹھے رہتے، دوسرا راستہ ملک کو بچانے کیلئے ہر چیز کی قربانی دے دیں، نوازشریف ، آصف زرداری ، بلاول بھٹو ، سردارمگسی ، عبدالعلیم خان اور وہ ساتھی جو ایوان میں پیچھے بیٹھے ہیں ، انہوں نے فیصلہ کیا سیاست قربان ہوتی ہے تو ہوجائے، آج بطور پاکستانی اور سیاستدان ہم اپنا کردار ادا کریں گے۔

انہوں نے کہا کہ پاکستان کے پاس بے پناہ صلاحیتیں موجود ہیں، ہمارے پاس دریا،سمندر ہے،، معزز ایوان بھرا پڑا ہے، عظیم پاکستانی اس ایوان اور چاروں صوبوں میں بیٹھے ہیں، جو ملک کی کشتی کو منجھدار سے نکال کر کنارے لے جائیں گے،  اس میں اہل دانش ، جرنلسٹ ، سیاستدان بھی ہیں، نوجوان پاکستان کا ہر اول دستہ ہیں، نوجوان اللہ تعالیٰ کا انمول تحفہ ہیں، ہم مل کر فیصلہ کرلیں ملک کی تقدیر بدلنی ہے تو انشااللہ ہم ہمالیہ نما چیلنجز کو عبور کریں گے، مل کر فیصلہ کرلیں تو پاکستان کو اس کا صحیح مقام دلائیں گے، کام مشکل ضرور ہے لیکن ناممکن نہیں ہے۔

پاکستان کو درپیش چیلنجز 

ان کا کہنا تھا کہ بڑے بڑے چیلنجز قوم کو کانٹے کی طرح چبھ رہے ہیں، پہلے ہمیں اس بات کا ادراک ہوجائے چیلنجز ، مشکلات ہیں کیا، بجٹ کے اس دوارنیے میں کل معدنیات کا اندازہ ہے وہ 12ہزار300ارب روپے ہے،  صوبوں کواین ایف سی ایوارڈ کے تحت تقسیم کے بعد صرف 7 ہزار300 ارب بچتے ہیں، 7 ہزار 300 ارب جو بچتے ہیں اس میں صرف سود کی ادائیگی 8ہزار ارب ہے، یعنی700 ارب کا ڈے ون سے خسارہ،  700ارب کا خسارہ ہو تو ترقیاتی منصوبوں کا پیسہ کہاں سے آئے گا، تعلیم ، صحت کے لیے پیسہ کہاں سے آئے گا،  افواج پاکستان کی تنخواہیں کہاں سے دیں گے، جب خسارہ ہو تو سرکاری افسران کی تنخواہیں کہاں سے دیں گے، پچھلے کئی سال سے سب کچھ قرض درقرض لیکر کیا جارہا ہے، یہ ہے وہ سب سے بڑا چیلنج جو قوم  کامسئلہ ہے۔

ان کا کہنا تھا کہ آج شعور کا راج ہونا چاہیے تھا، جس ایوان میں بیٹھے ہیں اس کے اخراجات بھی قرض سے ادا ہوتے ہیں، اسپیکر،پورے ایوان کی تنخواہ قرضوں سے ادا کی جارہی ہے، کیا یہ صورتحال اس بات کی متقاضی ہے شور شرابا کیا جائے، یا شعور کو فروغ دیا جائے،فیصلہ ایوان نے کرنا ہے، آج تک ہم 80 ہزار ارب بیرونی،اندرونی،پرائیویٹ قرض لے چکے ہیں، کیا اس صورتحال میں ایک عظیم ایٹمی قوت کا پاکستان اپنے وجود کو برقرار رکھ سکتا ہے؟، ہمیں اب نظام میں انقلابی تبدیلیاں لانی ہیں،  ہم نے مختلف شعبوں میں بنیادی ریفارم لانی ہیں، کوئی شک نہیں نوازشریف ، آصف زرداری ، بلاول بھٹو و دیگر اتفاق کریں گے، یا تو ہم قرضوں کی زندگی سے جان چھڑا لیں، یا جس طرح محکوم قومیں ہوتی ہیں سرجھکا کر خود کو چلائیں۔

 ’انشااللہ ہم ملکر پاکستان کو عظیم بنائیں گے‘

انہوں نے کہا کہ انشااللہ ہم ملکر پاکستان کو عظیم بنائیں گے، ایک اور کانٹوں بھرا چیلنج وہ بجلی کے ہوشربا قیمتوں میں اضافے کا ہے، گردشی قرضہ اس وقت بجلی کا 2300ارب پر پہنچ چکا ہے، 3800ارب کی بجلی ترسیل ہوتی ہے، وصولی صرف 2800ارب کی ہوتی ہے، ایک ہزار ارب کا گیپ ہے، آج کے ریٹ کے مطابق تقریبا ًساڑھے 3 ارب ڈالر بنتے ہیں، کیا یہ غریب قوم اس انتہائی بے دردی سے گورننس کی متحمل ہوسکتی ہے؟، ایک ہزارارب روپےسندھ ، بلوچستان ، کے پی ، پنجاب ، گلگت بلتستان اور کشمیر میں دنیا کے درجنوں اسپتال،یونیورسٹیاں بناسکتے ہیں۔

انہوں نے کہا کہ ہر سال ایک ہزار ارب  خسارے میں جارہا ہے، قوم کی حالت سب کے سامنے ہے، ایک بالٹی ہو اور نیچے سراخ ہواس میں جتنا پانی ڈالیں نکل جائے گا، ایک ہزار ارب کی سبسڈی دینے کے باوجود سال میں 500 سے600 ارب کی بجلی چوری ہوتی ہے، گھڑی چوری کی بات نہیں کر رہا ، بجلی چوری کی بات کر رہا ہوں۔

(اظہر تھراج)میاں محمد شہباز شریف پاکستان کے 24 ویں وزیر اعظم منتخب ہوگئے ہیں ۔شہباز شریف کون ہیں؟ میاں محمد شہباز شریف نے سنی اتحاد کونسل کے امیدوار عمر ایوب کو شکست دی۔شہباز شریف دوسری مرتبہ پاکستان کے وزیر اعظم منتخب ہوئے ہیں ۔شہباز شریف پاکستان کے 24ویں منتخب وزیراعظم ہیں ۔نگران وزیراعظموں کو ملا کر مجموعی طور پر 33 ویں وزیراعظم ہیں۔شہباز شریف کون ہیں؟

میاں شہبازشریف 1951 میں لاہور میں پیدا ہوئے،گورنمنٹ کالج سے بی اے کیا۔ پہلی بار 1988 میں پنجاب اسمبلی کے رکن بنے۔ 1993 میں پنجاب اسمبلی میں اپوزیشن لیڈربنے۔میاں شہبازشریف1990 میں ایم این اے بھی منتخب ہوئے۔1997 میں پہلی بار اور2008 میں دوسری باروزیراعلیٰ پنجاب بنے۔میاں شہبازشریف نے 2013میں تیسری بار پنجاب کی وزارت اعلیٰ سنبھالی ۔2018 ء میں میاں شہبازشریف قومی اسمبلی میں پہلے اپوزیشن لیڈر2022میں پہلی بار وزیراعظم پاکستان بنے۔

لازمی پڑھیں:میاں محمدشہبازشریف دوسری مرتبہ وزیراعظم پاکستان منتخب

  شہباز شریف تین سال  قومی اسمبلی میں قائدِ حزبِ اختلاف رہے ،گزشتہ اسمبلی میں تحریک عدم اعتماد کے جب وزیر اعظم عمران خان کو عہدے سے ہٹایا گیا تو شہبا شریف پہلی مرتبہ وزیر اعظم بنے ۔تاہم مرکز کی سیاست میں وہ کسی حد تک نووارد تصور کیے جاتے ہیں۔ ان کی پہچان صوبہ پنجاب کے حوالے سے زیادہ نمایاں رہی جہاں وہ تین ادوار میں مجموعی طور پر لگ بھگ 13 سال صوبے کے وزیرِاعلٰی رہے ہیں۔

اس دوران وہ کئی مرتبہ تقاریر میں اپنے جذباتی رویے تو کبھی اپنے کام کرنے کے انداز کی وجہ سے سیاسی مخالفین، میڈیا اور عوام کی توجہ کا مرکز رہے۔ کبھی انھیں لانگ بوٹ پہنے سیلابی پانی میں کھڑے دیکھا گیا تو کبھی وہ سرکاری اداروں پر ’اچانک چھاپے‘ مارتے نظر آتے تھے۔پنجاب میں شہباز شریف کے مختلف ادوار حکومت میں ان کے سیاسی مخالفین اور اپوزیشن جماعتیں ان کے اس انداز پر تنقید بھی کرتے رہیں لیکن ’شہبا ز سپیڈ‘کا کوئی بھی مقابلہ نہ کرسکا ۔شہبا زشریف کے بعد آنیوالے پنجاب کے منتخب وزرائے اعلیٰ عثمان بزدار،چودھری پرویز الٰہی وہ کام نہ کرسکے جو انہوں نے کیے۔شہباز شریف کی سپیڈ کو مت دی تو ایک نگران وزیر اعلیٰ نے دی جو ’محسن سپیڈ‘کے نام سے جانے جاتے ہیں ۔شہباز شریف نے بطور وزیر اعظم پاکستان کو معاشی طور پر ڈیفالٹ ہونے سے بچایا ۔

بزنس مین سے سیاستدان تک کا سفر
سابق وزیرِاعظم نواز شریف کے چھوٹے بھائی شہباز شریف نے تعلیم کے بعد خاندان کا کاروبار سنبھالا۔ 1985 میں شہباز شریف لاہور چیمبر آف کامرس کے صدر بنے تھے۔کاروبار کو بڑھاوا دینے کے بعد انھوں نے سیاست میں آنے کا فیصلہ کیا تو پہلی بار شہباز شریف سال 1988 کے انتخابات میں پنجاب اسمبلی کے رُکن بنے۔ سال 1990 میں قومی اسمبلی اورسال1993 میں دوبارہ پنجاب اسمبلی کے ممبر منتخب ہوئے۔ اسی سال وہ صوبائی اسمبلی میں اپوزیشن لیڈر بھی بنے۔

1997 کے انتخابات میں پاکستان مسلم لیگ ن نے کامیابی سمیٹی تو شہباز شریف پہلی مرتبہ صوبہ پنجاب کے وزیرِاعلٰی منتخب ہوئے۔شہباز شریف نے صوبے میں کئی منصوبے شروع کیے تاہم ان کی حکومت وقت سے پہلے اس وقت ختم ہو گئی جب اس وقت کے آرمی چیف جنرل پرویز مشرف نے  1999 میں مارشل لا نافذ کر دیا اور سابق وزیرِاعظم نواز شریف کے ساتھ ساتھ شہباز شریف کو بھی گرفتار کر لیا گیا۔
مشرف سے ڈیل اور جلا وطنی
سال 2000 میں شریف خاندان کی فوجی آمر جنرل پرویز مشرف کے ساتھ ایک مبینہ ڈیل ہوئی جس کے بعد وہ جلا وطن ہو کر سعودی عرب چلے گئے۔ شریف فیملی اس ڈیل سے انکار کرتی ہے۔
وزارتِ اعلٰیٰ کی کرسی کا کھیل
سات سال بعد شریف خاندان  2007 میں پاکستان واپس آیا تو اگلے ہی برس ملک میں عام انتخابات ہوئے۔ شہباز شریف ان انتخابات میں حصہ نہ لے سکے۔ ان کے خلاف 1998 میں لاہور کے علاقے سبزہ زار میں ماورائے عدالت قتل کے ایک واقعے میں ایف آئی آر درج تھی۔اس ایف آئی آر میں ان پر الزام عائد کیا گیا تھا کہ انھوں نے بطور وزیرِ اعلٰی اس پولیس مقابلے کا حکم دیا تھا جس میں چند افراد پولیس کے ہاتھوں مبینہ مقابلے میں مارے گئے تھے۔ شہباز شریف کی غیر موجودگی میں 2003 میں انسدادِ دہشت گردی کی عدالت نے ان کو نوٹس جاری کیے تھے۔ 2004 میں شہباز شریف نے اس مقدمے میں عدالت میں پیش ہونے کے لیے پاکستان واپس آنے کی کوشش کی تھی تاہم انھیں ائیرپورٹ ہی سے واپس بھیج دیا گیا تھا۔

 2007 میں شہباز شریف پاکستان واپس آئے تو انھیں اس مقدمے میں عدالت سے ضمانت لینا پڑی تھی تاہم عام انتخابات تک وہ اس مقدمے سے بری نہیں ہوئے اس لیے انھوں نے بعد میں ضمنی انتخاب میں حصہ لیا۔ وہ بھکر سے کامیاب ہو کر ایک مرتبہ پھر پنجاب کے وزیرِاعلٰی منتخب ہوئے تاہم اگلے ہی برس سپریم کورٹ نے ان کو نااہل قرار دے دیا۔
شہباز شریف نے اس فیصلے کے خلاف ایک لارجر بینچ میں درخواست دائر کی۔ دو ماہ بعد فیصلہ ان کے حق میں آیا اور وہ دوبارہ وزیرِاعلٰی کی کرسی پر بحال ہو گئے۔ 2013 کے انتخابات میں کامیابی کے بعد شہباز شریف مسلسل دوسری بار اور مجموعی طور پر تیسری بار پنجاب کے وزیرِاعلٰی منتخب ہو گئے۔ ان ہی 10 سال میں ان کے بارے میں ’سخت ایدمنسٹریٹر‘ ہونے کا تاثر سامنے آیا تھا۔
شہباز شریف نے تعلیم اور صحت کے شعبوں میں بھی کئی منصوبے مکمل کیے تاہم ان کے دور کے دو بڑے منصوبے ابتدائی طور پر بہت زیادہ تنقید کا نشانہ بنے۔
انھوں نے لاہور میں ٹریفک کے دباؤ کو کم کرنے کے لیے شہر میں میٹرو بس چلانے کا منصوبہ بنایا۔ اس وقت عمران خان حزبِ اختلاف میں تھے اور انھوں نے اس کو ’جنگلہ بس‘ کا نام دے کر تنقید کا نشانہ بنایا۔اس کے بعد یہی منصوبہ راولپنڈی اور اسلام آباد کے علاوہ ملتان میں بھی شروع کیا گیا۔ خود عمران خان کی حکومت والے صوبے خیبرپختونخوا میں بھی ایسا ہی پراجیکٹ شروع کیا گیا۔

اورنج لائن ٹرین چلانے کے منصوبے پر بھی شہباز شریف کو حزبِ اختلاف کی طرف سے تنقید کا سامنا کرنا پڑا۔لیکن یہ منصوبہ مکمل ہوکر رہا اور آج کامیابی سے چل رہا ہے۔
صوبے سے مرکز کا سفر
شہباز شریف اپنے بڑے بھائی نواز شریف کے سامنے سیاست میں ہمیشہ ثانوی کردار ادا کرتے رہے۔ جب بھی نواز شریف وزیرِاعظم بنے تو وزیراعلٰی شہباز شریف بنے۔تاہم2017 میں حالات اس وقت بدلے جب نواز شریف کو سپریم کورٹ نے پاناما کیس میں تاحیات نااہل قرار دے دیا۔ پارٹی کی صدارت تو شہباز شریف کے پاس آ گئی لیکن وزارت عظمیٰ شاہد خاقان عباسی کے حصے میں گئی۔2018 کے انتخابات میں شہباز شریف نے پنجاب چھوڑ کر مرکز میں آنے کا فیصلہ کیا۔ وہ قومی اسمبلی کے رکن منتخب ہوئے اور دوسری بڑی جماعت کے لیڈر ہونے کی وجہ سے قائدِ حزبِ اختلاف بھی منتخب ہو گئے۔

(24 نیوز)مسلم لیگ ن کے رہنما  حنیف عباسی نے کہا ہے خیبرپختونخوا میں بدترین دھاندلی ہوئی ہے۔

مسلم لیگ ن کے رہنما حنیف عباسی نے پیپلزپارٹی کے رکن قومی اسمبلی اعجاز جاکھرانی اور ایم کیو ایم کے رہنما امین الحق کے ہمراہ پارلیمنٹ ہاوس کے باہر میڈیا سے گفتگوکی۔
حنیف عباسی نے کہا ہے کہ پنجاب ،سندھ اور بلوچستان میں شفاف انتخابات ہوئے ہیں۔سروے کے مطابق خیبرپختونخوا میں بدترین دھاندلی ہوئی ہے۔سروے کے مطابق 58 فیصد لوگوں نے انتخابات کے نتائج کو قبول کیا ہے،حکومت پھولوں کی سیج نہیں ہے،حکومت کو معاشی چیلنجز سمیت بہت سارے مسائل کا سامنا ہے،ملک کو عدم استحکام پر دھکیلنےکے بجائے عوامی مسائل کو حل کرنا ضروری ہے۔

انہوں نے کہا ہے کہ پی ٹی آئی ملک دشمن ایجنڈے پر عمل پیرا ہے۔اتحادی جماعتوں کے ساتھ مل کر شہباز شریف کو ووٹ ڈالنے جا رہے ہیں،تمام اتحادیوں کا شہباز شریف پر مکمل اعتماد ہے،ہمیں قومی اسمبلی کی اکثریت کی حمایت حاصل ہے،شہباز شریف نے پہلے بھی شبانہ روز محنت سے ملکی معیشت کو بہتر کیا۔

ضرورپڑھیں:شہباز شریف بطور وزیراعظم پاکستان کیلئے خوشخبری ہیں:مریم اورنگزیب
ایم کیو ایم رہنما امین الحق نے کہا ہے کہ 8 فروری کے الیکشن شفاف تھے،آج وزیر اعظم کے انتخاب کا دن ہے،آج ضروری ہے کہ پاکستان کے لیے ڈائیلاگ کیا جائے۔ پی ٹی آئی کو کہتا ہوں قانونی طریقے سے اپنے حق کی جنگ لڑیں نا کہ لڑائی جھگڑا کریں،ایم کیو ایم مسلم لیگ ن کے ساتھ کھڑی ہے،پاکستان میں سیاسی استحکام آئے گا تو معاشی استحکام بھی آئے گا۔ڈائیلاگ کے ذریعے پاکستان کے مسائل کا حل کرنا چاہیے۔

پیپلز پارٹی کے رہنما  اعجاز جاکھرانی کا کہنا تھا کہ تحریک انصاف کے حمایت یافتہ ارکان کا وطیرہ ہے ملکی معیشت حالات تباہ کر دیے،اس وقت ملک کے حالات کچھ اچھے نہیں،ان حالات سے نکلنے کیلئے شہباز شریف کا وزیراعظم بننا ضروری تھا،پاکستان پیپلز پارٹی نے ہمیشہ ڈائیلاگ کی حمایت کی ہے،مل جل کر حکومت کو چلائیں گے۔

(24 نیوز)پاکستان مسلم لیگ ن کی سیکرٹری اطلاعات مریم اورنگزیب کا  کہنا ہے کہ شہباز شریف بطور وزیراعظم پاکستان کیلئے خوشخبری ہیں۔شہبازشریف کے وزیراعظم بننے سے2018 میں رکنےوالا ترقی کا سفر دوبارہ سے شروع ہوگا۔

پارلیمنٹ ہاؤس آمد پر میڈیا سے گفتگو کرتے ہوئے مریم اورنگزیب کا کہنا تھا ترقی کا جو سفر 2018 میں رک گیا تھا پھر سے شروع ہوگا، شہبازشریف نے پاکستان کو ڈیفالٹ سے بچایا، اب وہ معیشت کو استحکام دیں گے۔

ان کا کہنا تھا کہ شہباز شریف کے آنے کے بعد نوجوانواں کے روزگار،کاروبار اور ترقی کا دور شروع ہوگا، پاکستان میں سیاسی و معاشی استحکام آئے گا اور عوام کے مشکل حالات بہتر ہوں گے، پھر سے تعلیم، صحت، آئی ٹی، زراعت، صنعت اور نوجوانوں کی ترقی کا سفرشروع ہو رہا ہے، ‎4 سال بے رحمی سے ملک کے تمام شعبوں کوبرباد کیا گیا، اب ان کی بحالی اور تعمیرنوشروع ہوگی، شفافیت اور عوامی خدمت کا دور پھر سے شروع ہوگا۔

ضرورپڑھیں:کا غذات نامزدگی منظور،شہباز شریف،عمر ایوب میں مقابلہ آج ہوگا

‎سیکرٹری اطلاعات مسلم لیگ ن نے مزید کہا کہ نوجوانوں کو لیپ ٹاپ اور آئی ٹی میں ترقی کےمواقع دینے کا دور پھر شروع  ہو رہا ہے، نوجوانوں کو روزگاراورکھیل کے مواقع دینے کا دورپھرشروع ہو رہا ہے، پاکستان کے خارجہ تعلقات میں بہتری اور اعتماد کے نئے دور کا آغاز بھی ہو رہا ہے۔ شہبازشریف کے وزیراعظم بننے سے2018 میں رکنےوالا ترقی کا سفر دوبارہ سے شروع ہوگا۔

مسلم لیگ ن کےرکن قومی اسمبلی حمزہ شہبازشریف کا کہناہےکہ انشاءاللہ محنت کریں گے سب کو ساتھ لے کر چلیں گے۔

(24 نیوز)مسلم لیگ ن کے قائد نواز شریف نے جے یو آئی(ف)کے سربراہ مولانا فضل الرحمان سے تعاون کی درخواست کردی ۔

سابق وزیراعظم میاں محمد نواز شریف نےمولانا فضل الرحمان سے ان کی رہائشگاہ پر ملاقات ہوئی ہے۔اسلام آباد میں ہونے والی ملاقات میں احسن اقبال،اسحاق ڈار،  رانا ثنااللہ، خواجہ سعد رفیق اور مولانا غفور حیدری بھی شریک ہوئے۔ 

اس کے علاہ ملاقات میں گورنر کے پی غلام علی اور نورعالم خان نے بھی شرکت کی۔ذرائع کے مطابق نوازشریف نے مولانا فضل الرحمان کو ساتھ چلنےکی دعوت دی اور ملاقات میں ملکی سیاسی صورتحال پر بات چیت کی۔

لازمی پڑھیں:سرفراز بگٹی کے بلامقابلہ وزیراعلیٰ بلوچستان منتخب ہونے کا امکان

ذرائع کا کہنا ہے کہ ملاقات میں مولانا فضل الرحمان نے نوازشریف سے گلے شکوے بھی کیے  جبکہ مسلم لیگ ن کے قائد نے  مولانا سے  حکومت سازی میں مدد کی درخواست کی۔

(عثمان خان)الیکشن کمیشن نےسینٹ کی چھ خالی نشستوں پر انتخابات کے شیڈول کا اعلان  کردیا ہے۔

الیکشن کمیشن کی جانب سے جاری کیے گئے شیڈول میں کہا گیا ہے کہ سینٹ کی خالی نشستوں پر انتخابات کے لیے پولنگ 14 مارچ کو کروائی جائے گی۔سینٹ ارکان کے دیگر ایوانوں کے رکن منتخب ہونے پر چھ نشستیں خالی قرار دی گئی تھیں 

اسلام آباد کی ایک، سندھ کی دو، بلوچستان کی تین خالی نشستوں پر انتخابات کے شیڈول کا اعلان کیا گیا ہے۔

لازمی پڑھیں:سینیٹ سے 11 نشستیں خالی ،سینیٹر تاج حیدرنے جلد از جلد انتخابات کیلئےچیف الیکشن کمشنر کو خط لکھ دیا 

یاد رہے کہ سینیٹر تاج حیدر الیکشن کمیشن کو خط لکھا تھا جس میں مطالبہ کیا گیا تھا کہ انتخابی شیڈول کے ہر مرحلے کو مکمل کرنے کے لیے ایک دن سے زیادہ کا وقت نہیں دیا جاتا،  سینیٹ کی مذکورہ خالی نشستوں پر جلد از جلد انتخابات کرائے جائیں۔
 سینیٹر یوسف رضا گیلانی،سینیٹر جام مہتاب، سینیٹر نثار کھوڑو،سینیٹر غفور حیدری،سینیٹر سرفراز بگٹی، سینیٹر نزہت صادق، سینیٹر صادق سنجرانی، سینیٹر شہزادہ عمر، سینیٹر مرحوم رانا مقبول، سینیٹر شوکت ترین اور سینیٹر انوار الحق کاکڑنے سینیٹر شپ سے استعفیٰ دیا ہے۔

 (ویب ڈیسک)’کھایا پیا کچھ نہیں، گلاس توڑا بارہ آنہ‘۔نئی حکومت بننے سے پہلے مشکل میں پھنس گئی۔

پاکستان پیپلز پارٹی کے بعد حکومت کی اتحادی جماعت ایم کیو ایم نے بھی وفاقی کابینہ میں شامل نہ ہونے کا فیصلہ کرلیا  تاہم انہوں نے یہ یقین دہانی کرائی ہے کہ حل طلب معاملات پر پیپلز پارٹی سے بات چیت جاری رہے گی لیکن فی الوقت ڈیڈلاک برقرار ہے۔

قومی اخبار کی رپورٹ کے مطابق  ذرائع کا کہنا ہے کہ ایم کیو ایم  سپیکر ، وزیراعظم کیلئے ووٹ دینے کو تیار ہے تاہم چیئرمین سینیٹ اور صدرکو ووٹ دینے پر آمادہ نہیں،ایم کیو ایم رہنماؤں سے  سردار ایاز صادق، یوسف رضا گیلانی، خورشید شاہ، عبدالعلیم خان، خالد مگسی ودیگر رہنماؤں کی ملاقات بھی بے سود رہی ہے۔

 ذرائع کے مطابق ایم کیو ایم نے مطالبات تسلیم ہونے تک وفاقی کابینہ کا حصہ نہ بننے کا فیصلہ کر لیا ، تاہم ایم کیو ایم آج  قومی اسمبلی کے سپیکر اور ڈپٹی سپیکر کے انتخاب میں اپنا ووٹ سپیکر کو دے گی، جبکہ وزیراعظم کیلئے ووٹ دینے کیلئے بھی تیار ہے۔

ضرورپڑھیں:قومی اسمبلی ،سپیکر کا انتخاب خفیہ رائے شماری سے کیا جارہا ہے،ارکان کا شورشرابہ

 ذرائع کے مطابق چیئرمین سینیٹ اور صدر کے انتخاب میں ووٹ دینے پر آمادہ نہیں، ایم کیوایم نے مسلم لیگ (ن) کو اپنے فیصلہ سے آگاہ کردیا جبکہ مسلم لیگ (ن) کا کہنا ہے ایم کیو ایم کے ساتھ بات چیت جاری ہے، معاملات کا حل نکال لیں گے۔

یاد رہے وزیر اعظم کا انتخاب 3 مارچ کو ہوگا ،4 جماعتی اتحاد کے امیدوار مسلم لیگ ن کے شہباز شریف ہیں جبکہ سنی اتحاد کونسل کی طرف سے وزارت عظمیٰ کے امید وار عمر ایوب خان ہیں ۔

(24 نیوز)پاکستان کے انتخابات میں دھاندلی کے الزامات پر امریکی اراکین کانگریس نے انتظامیہ کو خط لکھ دیا۔ 

 ریاست ٹیکساس سےکانگریس مین گریگ کی قیادت میں یہ خط 28 فروری کوبھیجا گیا جسے 30 سے زائد امریکی اراکین کانگریس کی طرف سے بھیجا گیا ہے۔خط میں پری اور پوسٹ پول مبینہ دھاندلی کے الزامات پر خدشات کا اظہار کیا گیا ہے جب کہ انتخابی تشدد، انسانی حقوق اور بنیادی آزادیوں پر مبینہ پابندیوں کی مذمت بھی کی گئی ہے۔

ضرورپڑھیں:قومی اسمبلی کا ہنگامہ خیز اجلاس شروع،سپیکر،ڈپٹی سپیکر کا انتخاب آج ہوگا
خط میں زور دیا گیا کہ انتخابی مداخلت کی شفاف تحقیقات تک نئی پاکستانی حکومت کو تسلیم نہ کیاجائے اور پاکستانی حکام پر زیر حراست سیاسی افرادکو رہا کرنے پر زور دیا جائے۔

(24نیوز)پیپلز پارٹی کی رہنما شگفتہ جمانی بے نظیر بھٹو شہید کی تصویر والا لباس پہن کر قومی اسمبلی کی رکنیت کا حلف اٹھانے پہنچ گئیں ۔

 پیپلز پارٹی کی رکن قومی اسمبلی شگفتہ جمانی کا کہنا ہے کہ رستے کی ریاست اور پارلیمان کے تقدس میں زمین آسمان کا فرق ہوتا ہے۔ بے نظیر ہماری زندگی کی ساتھی، ہماری اُستاد ہماری لیڈر رہ چکی ہیں ان کو ہم کبھی بھول نہیں سکتے۔ آج میں جس مقام پر ہوں وہ محترمہ شہید بے نظیر بھٹو صاحبہ ہیں۔ اُنہوں نے اس ملک کی جمہوریت کو مستحکم رکھنے کیلئے اپنی جان کا نظرانہ پیش کیا۔ 
اُن کا کہنا تھا کہ ہم چاہتے ہیں کہ ہمارے لیڈر اور ممبران کی قربانیاں رائیگاں نہ جائیں اور اس ہاؤس کا جو تقدس ہے وہ برقرار رہے۔  کیونکہ اس کے تقدس کیلئے پاکستان پیپلز پارٹی نے بہت قربانیاں دی ہیں   اور اس ملک کو مستحکم کرنے کیلئے بھی پاکستان پیپلز پارٹی کے علاوہ کوئی ایسی پارٹی نہیں جس نے اتنی قربانیاں دی ہو۔

لازمی پڑھیں:قومی اسمبلی کے نومنتخب ارکان نے حلف اٹھا لیا ،سپیکر،ڈپٹی سپیکر کا انتخاب کل ہوگا
انہوں نے کہا ہے کہ ہماری دعا ہے کہ یہ ملک قائم اور دائم رہے،  وہ لوگ جو آج کہتے ہیں کہ ہم ووٹ لے کر آئے ہیں بہتر ہے کہ وہ دوسروں پر انگلی اُٹھانے کے بجائے تھوڑا سا اپنے گریبان میں بھی جھانک لیں اور جان لیں کہ رستے کی ریاست اور پارلیمان کے تقدس میں زمین آسمان کا فرق ہوتا ہے۔

(24 نیوز)سات سال بعد قومی اسمبلی آمد پر عمران خان نے نواز شریف کا پیچھا نہ چھوڑا،مسلم لیگ ن  کے قائد  نواز شریف پر عمران خان کا ماسک پھینک دیا، ویڈیو  بھی سامنے آگئی۔

تفصیلات کے مطابق  نئی قومی اسمبلی کے افتتاحی اجلاس میں نو منتخب اراکین نےحلف اٹھایا ، اجلاس شروع ہوتے ہی اپوزیشن کے ارکان نے ایوان میں احتجاج کیا، لیگی ارکان کی جانب سے نواز شریف کی آمد پر ان کے لئے نعرے بھی لگائے گئے۔اجلاس میں ’دیکھو،دیکھو کون آیا،شیر آیا،شیر آیا‘کے نعرے لگائے گئے۔

اجلاس کے بعد اسمبلی میں نواز شریف کی گفتگو کے دوران  کسی رکن نے نواز شریف کی جانب عمران خان کے ماسک سے حملہ کردیا، جس کی ویڈیو منظرعام پر آگئی۔ویڈیو میں دیکھا جا سکتا ہے کہ نواز شریف اور شہباز شریف آگے پیچھے کھڑے رہنماؤں سے گفتگو  کر رہے ہوتے ہیں کہ اسی دوران اسمبلی میں کھڑے نعرے لگاتے ارکان کی جانب سے عمران خان کے چہرے والا ماسک انکی طرف پھینکا جاتا ہے ، لیکن وہ کوئی بھی تاثر دیئے بغیر وہاں سے چلے جاتے ہیں۔

یہ بھی پڑھیں:قومی اسمبلی اجلاس،کئی اراکین عمران خان کا ماسک پہن کر پہنچ گئے

 خیال رہے  کہ قومی اسمبلی کے اجلاس میں پی ٹی آئی رہنما  شیر افضل مروت اور علی محمد خان سمیت کئی اراکین نےعمران خان  کے چہرے کا ماسک پہن کر پہنچے تھے۔

(24 نیوز)قومی اسمبلی کا اجلاس ایک گھنٹہ تاخیر کے بعد شروع ہوگیا،اجلاس کا وقت10 بجے طے تھا، نئی اسمبلی کے افتتاحی اجلاس میں نو منتخب اراکین نےحلف اٹھا لیا ۔

 قومی اسمبلی کے افتتاحی اجلاس میں  اسپیکر قومی اسمبلی راجا پرویز اشرف نو منتخب ارکان سے حلف لیا ۔سابق صدر آصف علی زرداری ،بلاول بھٹو نے بھی حلف اٹھا لیا ،آصفہ بھٹو بھی والد اور بھائی کے حلف اٹھانے کے موقع پر قومی اسمبلی میں آئیں ۔

آصفہ بھٹو نے قومی اسمبلی اجلاس میں نعر ے بھی لگوائے ۔آصفہ بھٹو نے نعرے لگوائے ’ اگلی باری ،پھر زرداری‘۔جیالے کارکنوں نے آصفہ بھٹو کے نعروں کا جواب دیا ۔نعروں کی یہ ویڈیو سوشل میڈیا پر وائرل ہے۔

(24 نیوز)پیپلز پارٹی کے رہنما اور سابق وزیراعظم یوسف رضا گیلانی نے سینیٹ کی نشست سے مستعفی ہوگئے۔

سابق وزیراعظم یوسف رضا گیلانی نے سینیٹ کی نشست سے اپنا استعفیٰ چیئرمین سینیٹ صادق سنجرانی کو پیش کردیا۔چیئرمین سینیٹ صادق سنجرانی نے یوسف رضا گیلانی کا استعفی منظور کرلیا جس کا نوٹیفکیشن  بھی جاری کردیا گیا ہے۔

پی پی رہنما نے قومی اسمبلی کے اجلاس میں  رکن قومی اسمبلی کی حیثیت سے حلف اٹھالیا ہے۔اس موقع پر ان کا کہنا تھا کہ ہر الیکشن پر دھاندلی کی ہی باتیں ہوتی ہیں،میں 1985 سے ہی ایسی باتیں سن رہا ہوں۔

واضح رہے کہ اس سے قبل یوسف رضا گیلانی کو چیئرمین سینیٹ بنائے جانے کی خبریں سامنے آئی تھیں اور ان کی سینیٹ نشست کی مدت ختم ہونے میں تین سال باقی تھے۔

(24 نیوز)نامزد وزیراعظم شہباز شریف نے عمران خان کی جانب سے آئی ایم ایف  کو لکھے گئے خط کو سائفر کے بعد ایک اور ملک دشمنی قرار دیدیا۔

گزشتہ روز پی ٹی آئی نے آئی ایم ایف کو خط لکھا تھا جس میں مطالبہ کیا گیا ہے کہ آئی ایم ایف 2 ہفتوں کے اندر قومی و صوبائی اسمبلیوں کی 30 فیصد نشستوں کا آڈٹ یقینی بنائے، آئی ایم ایف پاکستان کو مالی سہولت دینے سے پہلے گڈ گورننس سے متعلق شرائط رکھے اور آئی ایم ایف پاکستان کو مالی سہولت دینے سے پہلے دیگر شرائط سامنے رکھے۔

خط کے متن کے مطابق ہم یہ نہیں کہہ رہے کہ آئی ایم ایف تحقیقاتی ادارے کا کام کرے، فافن اور پتن نے عام انتخابات کے آڈٹ کا طریقہ کار بتا دیا ہے، ان کے دیے گئے طریقہ کار میں کچھ تبدیلیاں کرکے اطلاق کیا جائے، آئی ایم ایف کی مالی امداد پاکستانی عوام پر بوجھ بڑھائے گی۔

ضرورپڑھیں:قومی اسمبلی کا اجلاس،ارکان کی آمد جاری ،کارروائی تاخیر کا شکار
اس حوالے سے شہباز شریف نے اپنے بیان میں کہا کہ بانی پی ٹی آئی نے آئی ایم ایف کو لکھا ہے کہ پاکستان کے ساتھ نیا پروگرام نہ کیا جائے۔ پی ٹی آئی کا خط، سائفر کے بعد ملک دشمنی کا ایک اور ثبوت ہے، کسی کو کوئی شک نہیں رہنا چاہیے کہ یہ چاہتے ہیں پاکستان مکمل طور پر تباہ ہو جائے۔

انہوں نے مزید کہا میں سمجھتا ہوں بانی پی ٹی آئی کا آئی ایم ایف کو خط ایک انتہائی افسوسناک اقدام ہے، بانی پی ٹی آئی کے اس اقدام کی جتنی مذمت کی جائے کم ہے۔

صدر مسلم لیگ ن کا کہنا تھا کوئی پاکستانی کیسے بھی سیاسی اختلافات ہوں ملک کے لیے بددعا نہیں کرتا۔

یاد رہے قومی اسمبلی کا اجلاس آج ہورہا ہے جس میں نومنتخب ارکان اسمبلی حلف اٹھائیں گے ۔نومنتخب  ارکان اسمبلی سے سپیکر راجہ پرویز اشرف حلف لیں گے ۔

(24 نیوز)قومی اسمبلی کا اجلاس شروع ہونے سے چند منٹ قبل ن لیگ،جے یو آئی کے 2 سینیٹرز مستعفی ہوگئے۔

مسلم لیگ ن کی سینیٹر نزہت صادق اور جمعیت علماء اسلام (جے یو آئی) کے مولانا عبدالغفور حیدری نے سینیٹ کی نشستوں سے استعفیٰ دیدیا۔سنیٹر نزہت صادق نے اپنا استعفیٰ چیئرمین سینیٹ صادق سنجرانی کو پیش کیا جسے انہوں نے منظور کر لیا۔ سینیٹر نزہت صادق بطور رکن قومی اسمبلی حلف لیں گی۔

ضرور پڑھیں:قومی اسمبلی کا اجلاس آج پارلیمنٹ ہاؤس میں ہوگا

جمعیت علماء اسلام کے مولانا عبدالغفور حیدری بھی سینیٹ کی نشست سے مستعفی ہو گئے ہیں۔سینیٹر مولانا عبدالغفور حیدری نے بھی اپنا استعفیٰ چیئرمین صادق سنجرانی کو پیش کیا جسے انہوں نے منظور کر کے نوٹیفکیشن جاری کر دیا۔