ایران کا اسرائیل پرحملہ ،اقوام متحدہ کی سلامتی کونسل کا ہنگامی اجلاس طلب

اسرائیل نے ایران پر حملے کیلئے اصفہان کا انتخاب کیوں کیا؟

(ویب ڈیسک)اسرائیل نے ایران پر حملے کیلئے اصفہان کا انتخاب کیوں کیا؟

امریکا نے دعویٰ کیا ہے کہ اسرائیل نے ایران پر میزائل حملے کیے ہیں جبکہ ایرانی حکام نے اس حوالے سے تردید کی ہے۔اسرائیل نے اگر حملہ کیا ہے تو اس نے اصفہان کو ہی ٹارگٹ کیوں کیا؟

 اصفہان ایران کا تاریخی شہر اور ثقافتی گڑھ ہے اور سلجوق دور میں ایران کا دارالحکومت رہا ہے۔ یہاں متعدد تاریخی آثار موجود ہیں۔ اصفہان کے بارے میں مثل مشہور ہے، ’اصفہان نصف جہان،‘ یعنی اصفہان کی اہمیت آدھی دنیا کے برابر ہے۔

اسرائیل کا فضائی حملہ ؟ایران نے3ڈرون مار گرائے

(24 نیوز )ایران کی جانب سے اصفہان پر  اسرائیلی حملے کی تردید  کے بعد اب تین ڈرون مار گرانے کا دعویٰ سامنے آ گیا ۔

تفصیلات کے مطابق ایران کی جانب سے  اسرائیلی حملے کی نفی کی گئی ہے جبکہ دوسری جانب ایرانی میڈیا نے دعویٰ کیا ہے کہ ایران فورسز نے اصفہان میں فوجی اڈے کے قریب تین ڈرونز کو مار گرایا ہے،جبکہ امریکا کی جانب سے دعویٰ کیا گیا تھا کہ اسرائیل کی جانب سے ایران پر حملہ کیا گیا ہے جس کی ایرانی خبر رساں ایجنسی ’’تسنیم ‘‘ نے با وثوق ذرائع کے حوالے سے تردید کی  ۔

ایرانی میڈیا نے دعویٰ کیا ہے کہ حملہ آور ڈرونز بیرون ملک سے نہیں بلکہ ایران کے اندر سے ہی اُڑے ، اس لیے اسرائیل کی جانب سے میزائل حملے کا امریکی دعویٰ سرا سر غلط ہے ،اس حوالے سے ترجمان ایرانی سائبر اسپیس سینٹر کا بیان بھی سامنے آیا ہے جنہوں نے کہا ہے کہاسرائیل کے میزائل حملے کی ابھی کوئی اطلاع نہیں ہے، اصفہان کی فضا میں 3 ڈرونز  کو گرایا گیا  جس سے دھماکوں کی آواز سنی گئی،ایران کے سینئر کمانڈر نے بھی امریکی دعوے کو مسترد کرتے ہوئے کہا ہے کہ دھماکے کی آوازیں اصفہان میں مشکوک شےکو نشانہ بنانے کی تھیں، رات کے وقت ہونے والے حملے سے کوئی نقصان نہیں ہوا۔

ایرانی میڈیا  کے مطابق  ڈرونز حملے کے بعد تمام ایئرپورٹس کو بند کر دیا گیا جس کے باعث ہر قسم کی پروازیں بھی  معطل  ہیں ،  متعدد شہروں میں ائیرڈیفنس سسٹم فعال کر دیا  گیا،عالمی جوہری ایجنسی کا کہنا ہے کہ کہ ایرانی جوہری تنصیبات کو کوئی نقصان نہیں پہنچا، صورتحال کا قریب سے مشاہدہ کر رہے ہیں،عالمی جوہری ایجنسی نے فریقین سے تحمل کی اپیل کرتے ہوئے کہا ہے کہ جوہری تنصیبات کو کبھی بھی فوجی تنازعات میں نشانہ نہیں بنایا جانا چاہیے۔

واضح رہے کہ ایران کی جانب سے اسرائیل پر ڈرون اور میزائل داغے جانے کے بعد اسرائیل نے گزشتہ ہفتے ایران کو جوابی کارروائی کی دھمکی دی تھی ، اس ضمن میں امریکا، برطانیہ  اور کئی یورپی ممالک نے اسرائیل سے مطالبہ کیا کہ وہ کسی قسم کی جوابی کارروائی سے گریز کرے ۔

اس حوالے سے ایرانی صدر ابراہیم رئیسی نے بھی دوٹوک الفاظ میں اسرائیل کو خبردار کیا تھا کہ اگر اسرائیل نے ایران کو نقصان پہنچایا تو فوری، سخت اور وسیع پیمانے پر سنگین ردعمل ہوگا اور اس کے لیے وہ مزید 12 دن انتظار نہیں کریں گے۔

امریکا نے فلسطین کی اقوام متحدہ کی رکنیت سے متعلق درخواست ویٹو کردی

(24 نیوز)اقوام متحدہ کی سلامتی کونسل میں فلسطین کو مکمل ریاست کی رکنیت دینے کی درخواست پر امریکا نے ویٹو کردی۔

خبر رساں ادارے کے مطابق سلامتی کونسل کے 12 ارکان نے فلسطین کو اقوام متحدہ کی رکنیت دینے کی حمایت کی، برطانیہ اور سوئٹزر لینڈ نے قرارداد پر ووٹنگ میں حصہ نہیں لیا جبکہ امریکا نے درخواست کو ویٹو کردیا۔

فلسطینی صدر محمود عباس نے امریکا کی جانب سے درخواست ویٹو کرنے کی مذمت کرتے ہوئے اقدام غیر منصفانہ اور غیر اخلاقی قرار دیا۔

حماس نے بھی امریکی اقدام کی شدید الفاظ میں مذمت کرتے ہوئے کہا کہ انہیں امریکا کے اس اقدام سے متعلق پہلے سے خدشہ تھا۔

دوسری جانب اسرائیلی وزیر خارجہ نے ویٹو کرنے کے امریکی اقدام کی تعریف کرتے ہوئے کہا کہ آج سلامتی کونسل میں شرمناک تجویز مسترد کردی گئی۔

اسرائیلی وزیر خاجہ نے کہا کہ دہشتگردی پر فلسطینی ریاست کو انعام نہیں دیا جائے گا۔

اقوام متحدہ کے سیکریٹری جنرل انتونیو گوتریس نے کہا تھا کہ دوریاستی حل میں پیشرفت نہ کی گئی تو تشدد کا خطرہ بڑھے گا۔

اسرائیل نے ایران کے شہر اصفہان پرمیزائل حملہ کر دیا،امریکا

 (24نیوز)   امریکی میڈیا نے دعویٰ کیا ہے کہ اسرائیل نے ایران کے شہر اصفہان کے شمال مغربی علاقے  پر میزائل حملہ کر دیا، دھماکے کی نوعیت کا تاحال تعین نہیں کیا جا سکا۔

 غیرملکی میڈیا رپورٹس کے مطابق اسرائیل کی جانب سے ایران کے صوبے اصفہان میں ہوائی اڈے کو نشانہ بنایا گیا ہے، اس کے علاوہ شام اور عراق میں بھی اسرائیل کے فضائی حملہ کرنے کی اطلاعات موصول ہوئی ہیں، حملے کے بعد دھماکوں کی آوازیں بھی سنی گئی ہیں۔

ایرانی میڈیا نے دھماکوں کی تصدیق کرتے ہوئے بتایا کہ اصفہان ایئرپورٹ کے نزدیک دھماکے کی آواز سنی گئی، اسرائیل کے فضائی حملوں کے بعد ایران میں تہران، شیراز اور اصفہان کے ایئرپورٹ کو بند کر دیا گیا، ایئرپورٹس کی بندش کے بعد ہر قسم کی پروازیں بھی  معطل  کردی گئیں ۔  اصفہان کے ہوائی اڈے پر دھماکے کے بعد ایران نے متعدد شہروں میں ائیرڈیفنس سسٹم فعال کر دیا تاہم حملے کے بعد ابھی تک کسی قسم کے نقصان کی اطلاع موصول نہیں ہوئیں۔

ایران کی جانب سے اسرائیل پر ڈرون اور میزائل داغے جانے کے بعد اسرائیل نے گزشتہ ہفتے ایران کو جوابی کارروائی کا وعدہ کیا تھا، اس ضمن میں امریکا، برطانیہ  اور کئی یورپی ممالک اسرائیل سے مطالبہ کرتے رہے ہیں  کہ وہ کسی قسم کی جوابی کارروائی سے گریز کریں۔

اسرائیل پر ایرانی حملے،سلامتی کونسل کا ہنگامی اجلاس رسمی کارروائی کے بعد ملتوی

(24 نیوز)ایران کے اسرائیل پر حملے کے بعد بلایا گیا اقوام متحدہ کی سلامتی کونسل کا ہنگامی اجلاس رسمی کارروائی کے بعد ملتوی کر دیا گیا، سلامتی کونسل میں اسرائیل ایران تنازع پر مزید بحث بعد میں کی جائے گی۔

 اقوام متحدہ کی سلامتی کونسل کے ہنگامی اجلاس سے خطاب کرتے ہوئے اقوام متحدہ کے سیکرٹری جنرل انتونیو گوتریس نے کہا کہ کسی بھی ریاست کی علاقائی سالمیت کے خلاف طاقت کا استعمال منع ہے۔مشرق وسطیٰ تباہی کے دہانے پر ہے، خطے کو تباہ کن جنگ کے خطرے کا سامنا ہے، وقت آ گیا ہے کہ کشیدگی کم اور زیادہ سے زیادہ تحمل کا مظاہرہ کیا جائے۔ غزہ میں جنگ بندی، یرغمالیوں کی غیرمشروط رہائی اور امداد کی فراہمی سب کی مشترکہ ذمہ داری ہے۔

جو کچھ ہو رہا ہے وہ ہمیں عالمی جنگ کی طرف لے جا سکتا ہے :ڈونلڈٹرمپ

( ویب ڈیسک )سابق امریکی صدر ڈونلڈ ٹرمپ کا کہنا ہے کہ اگر وہ امریکا کے صدر ہوتے تو اسرائیل پر ایران کبھی حملہ نہ کرتا۔

امریکی ریاست پنسلوانیا میں جلسے سے خطاب کرتے ہوئے ڈونلڈ ٹرمپ کا کہنا تھا اسرائیل پر حملہ اس لیے ہوا کیونکہ موجودہ حکومت نے بڑی کمزوری کا مظاہرہ کیا، اس معاملے میں موجودہ حکومت نے جو کمزوری دکھائی ہے وہ ناقابل یقین ہے,صدر جو بائیڈن نہیں جانتے وہ کیا کر رہے ہیں، جو کچھ ہو رہا ہے وہ ہمیں عالمی جنگ کی طرف لے جا سکتا ہے۔

دوسری جانب ڈونلڈ ٹرمپ نے اپنی پریس کانفرنس میں عالمی جنگ کے خدشے کا اظہار کرتے ہوئے کہا کہ روس اور یوکرین کی جنگ تیسری عالمی جنگ میں بدل سکتی ہے اور جو کچھ اسرائیل اور ایران میں ہو رہا ہے وہ بھی ہمیں عالمی جنگ کی طرف لے جاسکتا ہے۔

ڈونلڈ ٹرمپ نے امریکی صدر جو بائیڈن کو شدید تنقید کا نشانہ بناتے ہوئے کہا کہ ہمارے پاس ایک صدر ہے جو دو جملے ساتھ نہیں بول سکتا، جو اسٹیج کی سیڑھیاں نہیں ڈھونڈ سکتا اور جو نہیں جانتا کے وہ کیا کر رہا ہے، ہم ایک عالمی جنگ میں ختم ہو سکتے ہیں.

ایران، اسرائیل کشیدگی کے بعد سعودی عرب بھی میدان میں آگیا

(24 نیوز)ایران اسرائیل کشیدگی کے بعد سعودی عرب بھی میدان میں آگیا ۔سعودی عرب نے خطے میں فوجی کشیدگی بڑھنے پر گہری تشویش کا اظہار کیا ہے۔

 ایران کی جانب سے اسرائیل پر کیے جانے والے ڈرون حملوں کے بعد خطے میں مزید بڑھتی کشیدگی کے تناظر میں سعودی عرب نے تمام فریقین کو 'انتہائی حد تک تحمل' کا مظاہرہ کرنے کی اپیل کی ہے۔

سعودی عرب کا کہنا ہے کہ تمام فریقین خطے اور اس کے لوگوں کو جنگوں کے خطرات سے بچانے کی کوشش کریں۔

مصر نے بھی خطے اورعوام کو عدم استحکام اور کشیدگی سے بچانے کیلئے فریقین سے تحمل کا مظاہرہ کرنے پر زور دیا ہے۔

ایران کا اردن پر بھی حملے کا اشارہ

(24 نیوز)ایران نے اسرائیل پر حملوں کے بعد اردن کیخلاف کارروائی کرنے کا بھی اشارہ دے دیا۔

 ایران نے اردن کو خبردار کرتے ہوئے کہا کہ اسرائیل کی حمایت کرنے والوں کے خلاف بھی کارروائی کریں گے کیونکہ ایران کے متعدد ڈرونز کو اردن کے طیاروں نے تباہ کیا تھا۔

ایرانی پاسدران انقلاب نے امریکا کو بھی اسرائیل کی حمایت نہ کرنے کا مشورہ دیتے ہوئے کہا کہ امریکا ایران کے مفادات کو نقصان نہ پہنچائے۔ایران کے حملے کے بعد اسرائیلی لڑاکا طیارے غزہ سے نکل گئے، غزہ جنگ کے بعد یہ پہلا موقع ہے کہ اسرائیلی لڑاکا طیارے غزہ میں موجود نہیں ہیں۔

اسرائیل پر حملے کے بعد ایرانی عوام کا جشن،نعرے لگاتےسڑکوں پر نکل آئے

(24 نیوز)ایرانی عوام اپنی حکومت کے ساتھ کھڑے ہوگئے۔اسرائیل پر ایران کے ڈرون حملوں پر ایران میں شہریوں نے جشن منانا شروع کر دیا۔

عالمی میڈیا کی رپورٹس کے مطابق ایران کی جانب سے اسرائیل پر فائر کیے گئے ڈرونز اور کروز میزائلز کے حملوں کے بعد تہران میں ایرانی شہری خوشی مناتے ہوئے سڑکوں پر نکل آئے۔

عوام ایران کے پرچم لے کر سڑکوں پر آگئے اور جشن بھی منایا۔

دوسری جانب لبنانی دارالحکومت بیروت  میں بھی اسرائیل پر ڈرون حملوں کی خوشی میں ریلی نکالی گئی۔

ایران کا اسرائیل پر جوابی وار،ڈرونزاور میزائلوں کی بارش کردی

(ویب ڈیسک)ایران نے دمشق میں ایرانی قونصل خانے پر حملے کا جواب دیتے ہوئے اسرائیل پر 200کے قریب ڈرون اورکروز میزائل داغ دیئے۔

غیر ملکی میڈیا کے مطابق ایران نے اسرائیل پر براہ راست ڈرون حملے کیے جس کی تصدیق ایرانی پاسداران انقلاب نے بھی کی جبکہ اسرائیل نے ایران کے متعدد ڈرون گرانے کا دعویٰ بھی کیا ہے۔

ایرانی میڈیا رپورٹ کے مطابق ایران نے اسرائیلی دفاعی تنصیبات کو نشانہ بنایا، گولان کی پہاڑیوں اور شام کے قریب اسرائیلی فوجی ٹھکانوں کو بھی نشانہ بنایا گیا۔

ایرانی میڈیا کا دعویٰ ہے کہ تہران اسرائیل میں 50 فیصد اہداف کو نشانہ بنانے میں کامیاب رہا، اسرائیلی فضائی اڈے پر خیبر میزائلوں کو ٹارگٹ کیا گیا, ڈرون اور بیلسٹک میزائل داغے گئے, حملے تقریباً 5 گھنٹے تک جاری رہے, ایران نے اسرائیل پر 185 ڈرون 110 میزائل اور 36 کروز میزائل داغے ہیں۔