ماہ رمضان میں ذیا بیطس کے مریض روزہ دار  کیا احتیاط کریں۔۔۔ جانئے

Apr 20, 2021 | 14:50:PM
ماہ رمضان میں ذیا بیطس کے مریض روزہ دار  کیا احتیاط کریں۔۔۔ جانئے
Stay tuned with 24 News HD Android App
Get it on Google Play

(24 نیوز) رمضان المبارک کے مہینہ میں روزہ رکھنا  ہر مسلمان کی خواہش ہوتی ہے لیکن  عام طور پر شوگر کے مریضوں کا سوال یہ ہوتا ہے کہ روزہ کیسے رکھا جائے؟،  اس حوالے سے لوگوں کے ذہنوں میں مختلف سوالات ابھرتےہیں کہ   گرمیوں میں کام کرنے والے شوگر کے مریض باہر نکلتے وقت کن خاص باتوں کا خیال رکھیں؟ ایسے افراد کا افطار اور سحری کا ڈائٹ پلان کیا ہونا چاہیے؟ انہیں پانی کتنی مقدار میں لینا چاہیے ؟ رمضان میں دوائیوں کے اوقات کیا رکھے جائیں؟ ۔۔۔۔

تفصیلات کے مطابق ذیا بیطس  کےمریضوں کے ان تمام سوالات کے جوابات پر  طبی ماہرین کی رائے ہے کہ مریض ایچ بی اے ون سی لیول کو مد نظر رکھتے ہوئے روزہ رکھ سکتے ہیں اگر شوگر کے مریضوں کا ایچ بی اے ون سی لیول 6 سے 7 فیصد کے درمیان ہے تو وہ روزہ رکھ سکتے ہیں۔لیکن اگر ان کا ایچ بی اے سی لیول 9 سے بڑھا ہوا ہوا ہے تو ان کو ڈی ہائیڈریشن اور کیٹو ایسڈ ڈوسز  کی وجہ سے روزہ رکھنے سے منع کیا جاتا ہے۔ ڈاکٹرز کی رائے میں اگردوران روزہ شوگر کے مریضوں کا انسولین لیول بڑھ جائے تو وہ انسولین لے سکتے ہیں شوگر کے مریض رات کی انسولین کی ڈوز سحری میں اور صبح کی ڈوز افطار میں لیں گے۔ ماہرین کی رائے میں شوگر کے مریضوں سمیت تمام افراد کے لئے ضروری ہےکہ افطار سے سحری کے درمیان2 سے ڈھائی لیٹر پانی لازمی پی لیں۔غذائی ماہرین کےمطابق شوگر کے مریضوں کو روزہ رکھنے کے لئے اپنی غذا کے شیڈول میں تبدیلیاں لانی ہوں گی۔ مثالی سحری کے لئے شوگر کے مریضوں کو متوازن غذا کا استعمال کرنا ہوگا۔غذا جتنی سادہ، متوازن اورصحت بخش  ہوگی اتنا ہی آپ توانا محسوس کرتے ہوئے اپنی صحت کو برقرار رکھ سکیں گے ۔ایسے مریضوں کی سحری کے لئے سب سے اہم فوڈ گروپ کاربوہائیڈریٹ(نشاشتہ ) ہے شوگر کے مریضوں کو ایسے کاربوہائیڈریٹ استعمال کرنا چاہییں جو مکمل اناج پر مبنی ہوں مثلاً چکی کےآٹے کی روٹیاں، پراٹھا ، گندم یا جو کا دلیا،براؤن بریڈ ،کاربوہائیڈریٹ کے پورشن (ہر شخص کی غذائی ضرورت کے اعتبار سے)سحری میں لئے جاسکتے ہیں ۔دوسرا گروپ پروٹین ہے جس کا استعمال ضروری ہے۔ اس میں ایک عدد انڈا، کباب ، دالیں ، چکن ،قیمہ بینز ، اس قسم کی کوئی بھی چیز مریض روٹی اور پراٹھے کے ساتھ لے سکتا ہے۔تیسرا اور اہم غذائی گروپ دودھ دہی کی بنی ہوئی اشیاء ہیں۔ شوگر کے مریض سحری میں ایک کپ چائے پی سکتے ہیں جبکہ کھجلہ پھینی سے گریز بہتر ہے۔ طبی ماہرین کے مطابق افطار میں شوگر کے مریض ایک یا دوکھجور کے ساتھ تازہ پھل سے بنے  جوس (ایک سے دو گلاس) جس میں آدھی مقدار پانی کی شامل ہو یا مشروب یا پھر دہی یا لسی یا دودھ کے ساتھ پھل والے شیک سے روزہ افطار کرسکتے ہیں۔اس کے علاوہ ایسے مریض چنا چاٹ لوبیا ، بغیر چینی کی فروٹ چاٹ ، دہی پھلکے افطار میں کھاسکتے ہیں ۔ شوگر کے مریضوں کے لئے ضروری ہے کہ افطار کرنے کے بعد رات کا کھانا ہلکی اور متوازن غذاؤں والا استعمال کریں۔ مثلاً سلاد ، دال ، سبزی ، چکن اور چکی والے آٹے کی روٹی کھائی جاسکتی ہے۔ جو مریض افطار میں کھانا کھانا چاہیں وہ کجھور اور مشروب سے روزہ کھولنے کے بعد رات کا کھانا کھاسکتے ہیں ۔ماہرین کا کہنا ہے کہ شوگر کے مریضوں کے لئے رمضان کے پہلے ہفتے میں شوگر کی مانیٹرنگ بے حد ضروری ہے خاص طور پر سحری سے پہلے اور افطار کے بعد ان کے لئے شوگر لازمی طور پر مانیٹر کرنا ضروری ہے تاکہ اس کے پیش نظر غذائی شیڈول مرتب کیا جاسکے ۔اگر روزے کے دوران شوگر کے مریضوں کو چکر یا غنودگی آنے لگیں یا پھر سر میں درد ہو توگھر پر ہی فوری طور پر گلوکومیٹر سے شوگر چیک کرنا ضروری ہے ۔ اگر بلڈ شوگر لیول کم آئے تو فوری طور پر روزہ کھول لینا ضروری ہے۔ جس کے لئے مریض کو ریفائنڈ شوگر مثلاًٹافی، شربت ، گلوکوز شربت یا شکر گھول کر پلائی جاسکتی ہے۔ پھر آدھے گھنٹے بعد کمپلیکس کاروہائیڈریٹ پر مشتمل غذا دیئے جائیں مثلاً بریڈ سلائس ، سیب ، گندم کے بسکٹ تاکہ بلڈ شوگر نارمل آسکے۔ شوگر والے مریضوں کو افطار میں اگر تلی ہوئی اشیاء استعمال کرنی ہوتو انکی مقدار کو بہت ہی محدود رکھا جائے۔شوگر کے مریض ایک کپ فروٹ چاٹ میں چینی کے بجائے ایک نارنگی کا رس ملاسکتے ہیں ۔چائے اور کیفین کا استعمال کم سے کم کریں۔ مرغن، مصالحہ دار اور تلی ہوئی اشیاء جسم میں پانی کی طلب بڑھاتی ہیں لہٰذا جسم کو ہائیڈریٹ رکھنے کے لئے ان چیزوں سے اجتناب رکھیں۔ایسے مریض سحری اور افطار کے دوران ، ہر آدھے گھنٹے کے بعد پانی کا استعمال کریں۔ان مریضوں کو چاہیے کہ گرمی کے روزوں کے دوران اپنے سر کو ڈھانپ کر نکلیں اور غیر ضروری باہر ہی نہ نکلیں ۔

یہ بھی پڑھیں: سابق آئی جی پولیس خیبرپختونخوا  ناصر خان درانی سپرد خاک