جی آیاں نوں،ایرانی صدر کالاہور میں شاندار استقبال،وزیراعلیٰ مریم نواز سے ملاقات

ایران کے صدر ابراھیم رئیسی  صرف نام کے ہی نہیں کردار کے بھی رئیس ہیں اُن کا دورہِ پاکستان تمام پاکستانیوں کے لیے ایک بڑی اور اہم خبر ہے یا یوں کہہ لیں کہ کسی بھی غیرملکی سرکاری وفد کا دورہ اس بات کا ثبوت ہوتا ہے کہ پاکستان اس دنیا سے کٹا ہوا کوئی ملک نہیں ہے اور گلوبل ویلیج میں اس کو خاص اہمیت حاصل ہے ، لیکن ایرانی صدر جناب ابراھیم رئیسی کا موجودہ دورہ کسی عام سربراہ مملکت کا دورہ نہیں ہے، یہ بھارتی سرزمین سے چند کلومیٹر دور کا دورہ لاہور ہے جس میں خاص پیغام جو میں آگے چل کر لکھوں گا ،دینا مقصود ہے  اسے دیکھنا ہی بین الاقوامی تناظر میں چاہیے، موجودہ دنیا میں اس وقت تمام صیہونی و نصارا اور بت پرستانہ قوتیں اسلام دشمنی میں جن ممالک کو اپنے لیے بڑا ہدف سمجھتی ہیں اُن میں ایران اور پاکستان سرفہرست ہیں لیکن ماضی قریب میں ہمارے ایران کے ساتھ تعلقات ویسے مثالی نہ رہے جیسے ہونا چاہیے تھے حالانکہ ایران وہ ملک ہے جس نے دنیا بھر میں پاکستان کو سب سے پہلے تسلیم کیا ۔
ایک زمانہ تھا کہ ہمارے تعلقات صرف ایک ہمسائیہ یا دوستانہ نہیں تھے بلکہ برادرانہ تھے،دونوں ملکوں کو سکے کا ایک رخ سمجھا جاتا تھا،شاہ ایران رضا شاہ پہلوی اور ان کی اہلیہ کو پاکستان میں دیو مالائی جوڑے کی حیثیت حاصل تھی، پاکستان کے وزیر اعظم ذوالفقار علی بھٹو اور شاہ ایران کی دوستی کی مثالیں دی جاتی ہیں۔ پاکستان میں رضا شاہ پہلوی کی بیوی فرح دیبا پہلوی کو بہت پذیرائی دی جاتی تھی لیکن 1979ء کےاسلامی  انقلاب ایران کے بعدایران میں ایک نئے عہد کا آغاز ہوا ، ایران فیصلہ کرچکا تھا کہ وہاں امریکا کا تسلط مزید قائم نہیں رہے گا اسی لیے ایرانی خارجہ پالیسی میں چین اور روس کا رنگ نمایاں ہوا ، افغان وار کے دوران شر پسندوں نے پاکستان اور ایران میں دوریاں پیدا کرنے کے لیے پاکستان کو ہی میدان بنایا ،اہل تشیع اور اہل سنت کے نام سے ایسی چنگاری بھڑکائی کہ اس کا خمیازہ آج تک پاکستان بھگت رہا ہے جب بھی یہ آگ بجھنے لگی دشمنان اسلام نے اس معاملے کو ہوا دی، نتیجہ یہ کہ ایک خدا مذہب ، کتاب ، نبیﷺ کے ماننے والے دو ملک عالمی برادری میں الگ الگ ہوگئے ۔
بھارت نے اس موقع کا بھرپور فائدہ اٹھایا اور گوادر سے نزدیک ترین ایرانی بندرگاہ چاہ بہار کو وسطی ایشیائی ملکوں تک رسائی کا ذریعہ بنایا ،بھارت نے اس بندرگاہ کو صرف تجارت کے لیے ہی نہیں استعمال کیا بلکہ پاکستان میں امن و امان کی صورتحال کو خراب کرنے اور جاسوسی کرنے کے لیے بھی استعمال کیا، یوں اسلامی ملک کی سرزمین اسلامی ملک کی سرزمین کے خلاف استعمال ہوئی، مارچ 2016 میں ایرانی صدر حسن روحانی نے پاکستان کا دورہ کیا،بھارت ایران پاکستان انڈیا گیس پائپ لائن سے پیچھے ہٹ گیا لیکن دونوں ملکوں نے استقامت دکھائی لیکن پھر بھارتی نیوی سے تعلق رکھنے والے آفیسر بھارتی جاسوس کلبھوشن یادیو کو پاکستان میں گرفتار کیا گیا اوروہ ثبوت بھی حاصل کرلیے گئے کہ بھارت کس طرح ایران کی سرزمین کو بلوچستان مین دہشت گردی کے لیے استعمال کر رہا ہے ، اس سے پاکستان اور ایران میں مزید دوریاں یقینی تھیں لیکن پاکستان کے اسوقت کے وزیر اعظم میاں نواز شریف کی کامیاب ڈیپلومیسی کے باعث دوریاں اتنی بھی نا بڑھی کے فاصلے رقابتوں میں بدل جاتے ، پاکستان کے ساتھ ایران پاکستان گیس پایپ لائن منصوبہ کھٹائی میں چلا گیا ۔

ضرورپڑھیں:2024 امریکا کا آخری سال "سپر پاور تباہ دے" 
عمران خان کے دور اقتدار میں ایک مرتبہ پھر پاکستان کو ایران سے نزدیک ہونے کا موقعہ ملا جب پاکستان نے ایران سعودی عرب تعلقات میں اپنا کردار ادا کرنے کا فیصلہ کیا اس سلسلے میں کوششیں بھی کی گئیں ، اس سال ایک مرتبہ پھر رقیبوں کے سینوں میں ٹھنڈک کے آثار پیدا ہوئے جب ایران نے پاکستان کے بلوچستان میں دہشت گردوں کے ٹھکانوں کا بہانہ بنا کر مزائیل داغے جس کے جواب میں پاکستان نے بھی مزائیل فائر کیے قریب تھا کہ دونوں ملک جنگ کی بھٹی مین جھونک دئیے جاتے اُسوقت کی پی ڈی ایم حکومت نے آرمی چیف حافظ عاصم منیر کی بصارت کے تحت معاملہ فہمی کا ثبوت دیا ایران کو باور کرایا گیا کہ پاکستان اپنا دفاع کرنا جانتا ہے اس لیے کوئی ایسی حرکت نا کرئے جو ایک ایٹمی ملک کو انتہائی قدم اٹھانے پر مجبور کرئے معاملہ باہمی رضا مندی سے ختم ہوا ۔

یہ بھی پڑھیں:نواز شریف بھاگو!ہم پر قحط کا عذاب آنے والا ہے 
آج جب ایرانی صدر ابراھیم رئیسی دورہ پاکستان پر آئے ہیں تو اسلام اور پاکستان دشمنوں کی نبضیں ڈوب رہی ہیں، اُن کے دورہ پاکستان میں پاک ایران ، گیس پائپ لائن ، باہمی تجارت ، اور دفاع دہشتگردوں کے خلاف کارروائی کے حوالے سے یاداشتوں پر دستخط کیے گئے ، اس دورے کے دوران ایرانی صدر نے مزار اقبال پر کھڑے ہوکر جو گفتگو مولانا عبدالخبیر آزاد سے کی وہ ایک صدر کی رسمی گفتگو نہیں تھی، اُن کا کہنا تھا کہ وہ پاکستان میں عوامی جلسے سے خطاب کرنا چاہتے تھے وہ براہ راست عوام سے گفتگو میں بتانا چاہتے تھے کہ ہم سب ایک ہیں ہمارا دوست، ہمارا دشمن ایک ہے ،ہم سب صیہونیت کے خلاف غزہ اور فلسطین کے عوام کے ساتھ ہیں۔

 انہوں نے کہا کہ پاکستان اور ایران دونوں ملک ہر قسم کی دہشت گردی کے خلاف ہیں اور اس کے خلاف مشترکہ جدوجہد کریں گے ،انہوں نے فکر اقبال اور اُن کی شاعری کی تعریف کی اور یہ سب کچھ بھارت سے چند کلومیٹر دور سرحدی شہر لاہور میں کہا گیا ہے، بھارت ایران میں چاہ بہار کی بندر گاہ پر اربوں روپے کی سرمایہ کاری کرچکا ہے ،اس طرح اس رئیس ایران نے انڈیا کو کنگال کیا ،خطےمیں پاکستان ایران کے اس دورے سے دکھ امریکا اور اس کے لے پالک اسرائیل کو بھی ہوا ہے کہ وہ بھی ایران کو تنہا کرنے کے لیے اربوں ڈالرز لگا چکے ہیں یو ں اس ایک دورے سے جہاں پاکستان اور ایران نے بڑی کامیابی حاصل کی ہے ،وہیں دنیا بھر میں ایران کی عزت و آبرو میں بھی اضافہ ہوا ہے۔

نوٹ:بلاگر کے ذاتی خیالات سے ادارے کا متفق ہونا ضروری نہیں ۔ایڈیٹر 

(24 نیوز)ایرانی صدر ابراہیم رئیسی نے لاہور پہنچنے پرمزاراقبالؒ پر حاضری دی،مزار پر فاتحہ خوانی کی ،ابراہیم رئیسی دعا کے دوران جذباتی ہوگئے۔وزیرٹرز بک میں اپنے تاثرات درج کیے۔مزار کے احاطے میں لوگوں میں گھل مل گئے ،اعلیٰ حکام نے ایرانی صدر کو بریفنگ بھی دی ۔ایرانی صدر کا کہنا تھا کہ پاکستان اور ایران کے دل ہمیشہ ایک ساتھ جڑے رہیں گے، پاکستان میں عوامی جلسے سے خطاب کرنا چاہتا تھا مگر کچھ وجوہات کی وجہ سے عوامی جلسے سے خطاب ممکن نہ ہوپایا۔

ایرانی صدر ابراہیم رئیسی نے مزاراقبالؒ پرحاضری کے دوران  پرپھول رکھے،چیئرمین رویت ہلال کمیٹی اور بادشاہی مسجد کے خطایب مولانا عبدالخبیرآزاد نے پاک ایران دوستی اورمعاہدوں کی کامیابی کی دعا کرائی ،مولانا عبدالخبیر آزادنے ملک وقوم کی سلامتی ،باہمی بھائی چارے کی دعا بھی کروائی ۔مزاراقبالؒ پر غزہ کے مسلمانوں کے لیے بھی خصوصی دعا کروائی گئی ۔
ایرانی صدر ابراہیم رئیسی نے شاعرمشرق ڈاکٹرعلامہ محمداقبالؒ کوخراج عقیدت پیش کیا ۔ایرانی صدر ابراہیم رئیسی نے کہا کہ ہمیں پاکستان میں اجنبیت کااحساس نہیں ہوتا۔

قبل ازیں ایرانی صدر ابراہیم رئیسی  کے لاہور پہنچنے پروزیراعلیٰ پنجاب مریم نواز نےاستقبال کیا ۔ اس موقع پر سینیٹر پرویز رشید، وزیر اطلاعات عظمیٰ بخاری، وزیر خزانہ مجتبیٰ شجاع ، صوبائی وزرا سلمان رفیق، بلال یاسین، چوہدری شافع، چیف سیکرٹری، آئی جی پولیس اور ایرانی قونصل جنرل مہران مواحدفر سمیت دیگر حکام موجود تھے۔

ضرورپڑھیں:پاک ایران اہم معاہدے،امریکا کو دھچکا لگ گیا ،اسرائیل کی کہانی ختم

اس موقع پر گفتگو کرتے ہوئے ایرانی صدر نے کہا کہ علامہ اقبال کی شخصیت ہمارے لیے بہت اہم ہے کیونکہ علامہ اقبال نے پیغام دیا کہ کیسے استعمار کے خلاف کھڑے ہونا ہے۔ مجھے پاکستان آکر  اجنبیت  احساس نہیں ہوا اور پاکستان کے لوگوں میں ایران کے ساتھ خاص وابستگی پائی جاتی ہے، پاکستان کے لوگوں کو سلام پیش کرتا ہوں۔

ابراہیم رئیسی کا کہنا تھا کہ پاکستان اور ایران کے دل ہمیشہ ایک ساتھ جڑے رہیں گے، پاکستان میں عوامی جلسے سے خطاب کرنا چاہتا تھا مگر کچھ وجوہات کی وجہ سے عوامی جلسے سے خطاب ممکن نہ ہوپایا۔ 

انہوں نے مزید کہا کہ غزہ سے متعلق اصولی مؤقف پر پاکستان کو سراہتے ہیں ، اپنی قوم اور اپنے مجاہدوں پر بہت ناز ہے ، اسرائیل سے جنگ میں فلسطینی کامیاب ہوں گے۔

 (ویب ڈیسک)ایران کے صدر ابراہیم رئیسی کے دورہ پاکستان پر امریکا کی جانب سے ردعمل سامنے آ گیا ہے۔

امریکی محکمہ خارجہ کے ترجمان نے پاک ایران تجارتی معاہدوں پر ردعمل دیتے ہوئے کہا ہے کہ ایران کے ساتھ تجارتی معاہدوں پر پابندیوں کا خطرہ ہو سکتا ہے، تجارتی معاہدوں پر غور کرنے والوں کو ممکنہ پابندیوں کے خطرے سے آگاہ رہنے کا مشورہ دیتے ہیں۔

ترجمان امریکی محکمہ خارجہ میتھیو ملر نے پریس بریفنگ کے دوران اظہار خیال کرتے ہوئے مزید کہا ہے کہ امریکا پاکستان کی سب سے بڑی برآمدی منڈیوں میں سے ایک ہے، اپنی شراکت داری کو جاری رکھنے کے منتظر ہیں۔

یہ بھی پڑھیں: لاہور سمیت پنجاب کے مختلف شہروں میں بارش، موسم خوشگوار

میتھیو ملر نے کہا کہ اسرائیل کو آگاہ کر دیا کہ امریکا بے گھر فلسطینیوں کی واپسی چاہتا ہے، رفاہ میں پناہ گزین فلسطینیوں کی تعداد 14 لاکھ سے بڑھ گئی، کوئی جواز نہیں کہ رفاہ میں اسرائیل فوجی آپریشن کرے، اسرائیل نے رفاہ پر گراؤنڈ آپریشن نہیں کیا۔

ماہرین کا کہنا ہے کہ اگر پاک ایران بہتر تعلقات امریکا کے مفاد میں نہیں تو وہ امریکا کا مفاد ہے ہمارا نہیں۔پاکستان کے ایران کے ساتھ تعلقات امریکا کا نہیں ہمارا معاملہ ہے، اگر پاک ایران بہتر تعلقات امریکا کے مفاد میں نہیں تو وہ امریکا کا مفاد ہے ہمارا نہیں۔

انہوں نے کہا کہ ایرانی صدر کا دورہ اس لیے بھی اہم ہے کہ کچھ عرصہ پہلے دونوں ممالک میں کشیدگی ہوئی تھی، کشیدگی سے ہوئے نقصان کے ازالہ کے لیے بھی یہ اقدامات ضروری ہیں۔  پاکستان چین کے تعلقات 70 دھائیوں سے مضبوط رہے ہیں۔ 

(24 نیوز)ایرانی صدر کی پاکستان میں کھڑے ہوکر اسرائیل کو للکار ،ایرانی صدر ابراہیم رئیسی نے کہا ہے کہ غزہ کے عوام سے یکجہتی پر پاکستان کے عوام کو سلام پیش کرتا ہوں ،غزہ کے عوام کی نسل کشی ہورہی ہے۔غزہ کے عوام کو ایک دن انصاف مل جائے گا ۔سلامتی کونسل غزہ کے معاملے پر ذمہ داریاں ادا نہیں کررہی۔

 ایرانی صدر وزیر اعظم پاکستان شہبازشریف کے ساتھ  مشترکہ پریس کانفرنس میں بات کرتے ہوئے کہنا تھا کہ میں وزیر اعظم اور حکومت پاکستان کا پرتپاک استقبال پر شکریہ ادا کرنا چاہتا ہوں اور سب کو سلام کرتا ہوں، پاکستان کی سرزمین ہمارے لیےقابل احترام ہے، فلسطین میں جاری اسرائیلی جارحیت کاخاتمہ ضروری ہے، غزہ کے عوام کی حمایت پرپاکستان کےعوام کو سلام پیش کرتا ہوں، غزہ کےعوام کی نسل کشی ہورہی ہے، سلامتی کونسل غزہ کے معاملے پر ذمہ داریاں ادا نہیں کررہی، غزہ کےعوام کوایک دن ان کاحق اور انصاف مل جائےگا۔

ابراہیم رئیسی کا کہنا تھا کہ ہمیں یقین ہے کہ آج دنیا کے مختلف ممالک میں لوگ تکلیف میں ہیں اور عالمی ادارے بشمول اقوام متحدہ جو انسانی حقوق کی حمایت کا اعلان کرتی ہیں نے یہ ثابت کردیا کہ وہ نا اہل ہیں، آج پاکستانی اور ایرانی اور باشعور دوسری قومیں اس آپریشن کو ختم کرنے کا مطالبہ کرتی ہیں۔ آج ہمارے برادر ملک پاکستان کے ساتھ تعلقات صرف دو ہمسایہ ممالک کے ناطے تک محدود نہیں ہیں، ہمارے تعلقات تاریخی ہیں، مجھے لگتا ہے کہ ایران اور پاکستان کی قوموں کے درمیان مشترکہ مذہبی رشتہ ہے اور کو کوئی نہیں توڑ سکتا۔

انہوں نے کہا کہ پاکستان اور ایران میں بہت صلاحیت ہیں اور اور دو ملکوں کے درمیان ان ممکنہ صلاحیتوں کا تبادلہ دونوں ملکوں کے فائدے میں ہو گا۔آج کی ملاقات میں ہم نے تجارتی، سیاسی اور ثقافتی ہر سطح پر دوطرفہ تعلقات کو فروغ دینے کا فیصلہ کیا۔

ان کا کہنا تھا کہ ہمارے دہشت گردی کے خلاف جنگ، منشیات کے خلاف جنگ سمیت بہت سے مشترکہ مؤقف ہیں جو ہمارے دونوں ممالک کو خطرے میں ڈال رہے ہیں اور میں بہت بہادری سے کہہ سکتا ہوں کہ ہمارے دونوں ممالک کے درمیان علاقائی، دو طرفہ اور بین الاقوامی سطح پر تعاون کی رسائی انسانی حقوق کے تعاون پر مبنی ہے۔

ایرانی صدر نے کہا ایران اور پاکستان کے درمیان اقتصادی اور تجارتی حجم قابل قبول نہیں ہے، ہم نے پہلے مرحلے میں دونوں ممالک کے درمیان تجارتی حجم کو 10 ارب ڈالر تک بڑھانے کا فیصلہ کیا ہے۔

مختلف شعبوں میں تعاون کے معاہدے طے 

قبل ازیں تقریب میں پاکستان اور ایران کے درمیان سیکیورٹی تعاون کے معاہدے کی دونوں فریقین نے توثیق کی، پاکستان اور ایران کے درمیان سول معاملات میں عدالتی معاونت کا معاہدہ بھی طے پاگیا۔

اس کے علاوہ پاکستان اور ایران کے درمیان ویٹرنری اور جانوروں کی صحت کے شعبے میں تعاون کا معاہدہ بھی طے ہوگیا، خصوصی اقتصادی زون کے قیام سے متعلق مشترکہ تعاون کے سمجھوتے پر بھی دستخط کیے گئے۔

وزارت سمندر پار پاکستان، انسانی وسائل کی ترقی، ایرانی کوآپریٹو، وزارت سوشل ویلفیئر کے درمیان ایم اویوپر دستخط کیے گئے، فلم کےتبادلےکےلیےوزارت اطلاعات اور ایران کی وزارت ثقافت کے درمیان ایم او یو پر دستخط کردیے۔

اس کے علاوہ پاکستان اسٹینڈرڈ کنٹرول اتھارٹی،ایران کی نیشنل اسٹینڈرڈآرگنائزیشن کےدرمیان مفاہمتی یاداشت اور باہمی قانونی تعاون کے لیے وزارت قانون و انصاف، ایران کی وزارت قانون میں مفاہمتی یاداشت پردستخط کیے گئے۔

 ایران کے ساتھ ہمارے دیرینہ برادرانہ تعلقات ہیں:وزیراعظم 

اس موقع پر تقریب سے خطاب کرتے ہوئے وزیر اعظم کا کہنا تھا کہ ایران کے ساتھ ہمارے دیرینہ برادرانہ تعلقات ہیں، ایرانی صدرسے سیکیورٹی اور تجارت سمیت دوطرفہ پہلوؤں پرتبادلہ خیال ہوا۔دونوں ممالک کے درمیان جو باہمی رشتے ہیں مذہب، تہذیب تجارت کے حوالے سے تفصیلی گفتگو کی گئی، اس میں شک نہیں کہ 1947 میں ایران ان چند ممالک میں سر فہرست جس نے پاکستان کو تسلیم کیا، ہمارے رشتے صدیوں پر محیط ہیں، یہ ہے وہ تعلق جس کو آج ہم نے ترقی و خوشحالی اور عوام کی بہتری کے لیے استعمال کرنا ہے۔

شہباز شریف نے کہا کہ ایران کے لوگ بہت خوبصورت ہیں، آج آپ اسلام آباد لائے ہیں ، آپ بزرگ تہران سے اسلام آباد آئے اور یہ بھی ایک خوبصورت شہر ہے تو یہ خوبصورتی کا ایک حسین مقابلہ پیش کرتا ہے۔ جناب صدر آپ فقہ قانون جیسے موضوعات پر کافی معلومات رکھتے ہیں، آپ کی قیادت میں ایران نے ترقی کی اور یہ موقع ہے کہ پاک ایران تعلقات کو بہتر کریں اور سرحدوں پر ترقی اور خوشحالی کے مینار قائم کریں، ہمیں یہ موقع ملا ہے کہ ہم اس دوستی کو ترقی اور خوشحالی کے سمندر میں بدل دیں۔

وزیراعظم کا کہنا تھا کہ آج ہم نے جو اقتصادی ترقی کے فیصلے کیے وہ منظر عام پر آجائیں گے، میں آپ کو ستائش پیش کرنا چاہتا ہوں کہ غزہ کے مسلمانوں پر جو پہاڑ توڑے جارہے ہیں تو آپ نے ایک مضبوط مؤقف اپنایا اور پاکستان اس سلسلے میں غزہ کے بھائی بہنوں کے ساتھ ہے، ایسا ظلم پہلے کبھی نہیں دیکھا کہ 34 ہزار مسلمان شہید کردیے گئے، بچے شہید کردے گئے اور آج بھی سیکیورٹی کونسل کی قرارداد کی دھجیاں اڑائی جارہی ہیں اور اقوام عالم خاموش ہے تو اسلامی ممالک کو مل کر ہر فورم پر اپنی بھرپور آواز اٹھانی چاہیے تا وقت کہ فلسطین میں جنگ ختم نہیں ہوجاتی۔

وزیر اعظم نے بتایا کہ اس طرح کشمیر کی وادی ان کے خون سے سرخ ہوچکی ہے، میں آپ کا شکریہ ادا کرتا ہوں کہ آپ نے کشمیریوں کے آواز اٹھائی اور مجھے امید ہے کہ کشمیریوں کو ان کے حقوق ملیں گے۔ہ آخر میں میں آپ کا اور آپ کے وقد کا شکرگزار ہوں کہ آپ اپنے دوسرے گھر کا دورہ فرما رہے ہیں اور اس کے نتیجے میں ہمارے تعلقات مزید مضبوط ہوں گے، ایران پاکستان دوستی زندہ باد۔

(24 نیوز) ایرانی صدر ابراہیم رئیسی وزیراعظم ہاؤس پہنچ گئے جہاں ان کا پرتپاک استقبال کرتے ہوئے گارڈ آف آنر پیش کیا گیا۔

تفصیلات کے مطابق ایرانی صدر ابراہیم رئیسی کے وزیراعظم ہاؤس پہنچنے پر وزیراعظم اسلامی جمہوریہ پاکستان محمد شہباز شریف نے ان کا پرتپاک استقبال کیا اور انہیں گارڈ آف آنر کا معائنہ کروایا گیا،وزیراعظم شہباز شریف نے ایرانی صدر سے وفاقی کابینہ کے اراکین کا تعارف کروایا جس کے بعد ایرانی صدر نے وزیراعظم ہاؤس میں ارتھ ڈے کی مناسب سے پودا بھی لگایا اور دعا کی۔

قبل ازیں ایرانی صدر کے ہمراہ اہلیہ اور اعلیٰ سطح کے وفد کے ہمراہ پاکستان پہنچے، وفد میں ایرانی وزیر خارجہ، کابینہ کے دیگر ارکان، اعلیٰ حکام اور تاجر بھی شامل ہیں۔

پاکستان پہنچنے پر ایران کے صدر ابراہیم رئیسی کا استقبال وفاقی وزیر ریاض پیرزادہ نے کیا۔

ترجمان دفتر خارجہ ممتاز زہرا بلوچ کے مطابق اپنے دورے کے دوران ایرانی صدر ابراہیم رئیسی پاکستانی ہم منصب صدر آصف علی زرداری اور وزیراعظم شہباز شریف سے اہم ملاقاتیں کریں گے۔

‎ایرانی صدر چیئرمین سینیٹ اور اسپیکر قومی اسمبلی سے بھی ملیں گے جبکہ لاہور اور کراچی کا بھی دورہ کریں گے جہاں وہ صوبائی قیادت سے ملاقاتیں کریں گے۔

دفتر خارجہ کی ترجمان کے مطابق ‎ملاقاتوں میں پاک ایران تعلقات کو مزید مضبوط بنانے، تجارت، عوام سے عوام سمیت باہمی رابطوں، توانائی اور زراعت کے شعبوں میں باہمی تعاون کے فروغ پر بات چیت کی جائے گی۔

ایرانی صدر کے دورے کے موقع پر علاقائی اور عالمی امن و سلامتی کے علاوہ دہشتگردی کے مشترکہ خطرے سے نمٹنے کیلئے دوطرفہ تعاون پر بھی بات چیت کی جائے گی۔

ترجمان دفتر خارجہ کا کہنا ہے ایرانی صدر کا پاکستان کا دورہ دو طرفہ تعلقات کو مزید مستحکم کرنے کا ایک اہم موقع فراہم کرے گا۔

خیال رہے کہ ایرانی صدر ابراہیم رئیسی کا دورہ پاکستان میں عام انتخابات کے بعد کسی بھی سربراہ مملکت کا یہ پہلا دورہ ہوگا۔

صدر ابراہیم رئیسی کی پاکستان آمد کے موقع پر خصوصی سکیورٹی پلان مرتب دیا گیا ہے، اس سے پہلے پاکستان میں ایران کے سفیر ڈاکٹر رضا امیری مقدم نے وزیرداخلہ محسن نقوی سے ملاقات میں سکیورٹی امور سے متعلق تبادلہ خیال کیا تھا۔
 

(بابر شہزاد ترک)اسلامی جمہوریہ ایران کے صدر ابراہیم رئیسی آج پاکستان کے  3 روزہ سرکاری دورے پر اسلام آباد پہنچ گئے۔

تفصیلات کے مطابق اسلامی جمہوریہ ایران کے صدر ابراہیم رئیسی  کے پاکستان پہچنے پر وفاقی وزیرریاض حسین پیرزادہ نے معزز مہمان کا استقبال کیا،ریاض حسین پیرزادہ ایرانی صدر کے ہمراہ لاہور اور کراچی بھی جائیں گے۔

 اسلامی جمہوریہ ایران کے صدر 24 اپریل تک پاکستان میں قیام کریں گے،ایرانی صدر ابراہیم رئیسی کے ہمراہ اُن کی اہلیہ جمیلہ عالم الہدی بھی ہیں،ایرانی صدر کی آمد کے مناظر سرکاری ٹی وی پر براہِ راست نشر کئے گئے ہیں، اس کے علاوہ ایرانی وزیرِ خارجہ حسین امیر عبداللہیان بھی ایرانی صدر کے ہمراہ پاکستان پہنچ گئے۔

ایرانی صدر کے ہمراہ 30 سے 40 افراد پر مبنی ایک بڑا وفد بھی اسلام آباد پہنچا ہے،وفد میں متعدد ایرانی وزراء سیاسی و اقتصادی حکام اور میڈیا نمائندگان شامل ہیں۔

سفارتی ذرائع کے مطابق  ایران اسرائیل تنازع کے بعد ایرانی صدر کا کسی بھی ملک کا یہ پہلا دورہ ہے، ابراہیم رئیسی پاکستان میں انتخابات اور نئی حکومت کے قیام کے بعد دورہ کرنے والے پہلے سربراہِ مملکت ہیں۔

ایرانی صدر کو آج وزیر اعظم ہاؤس میں گارڈ آف آنر پیش کیا جائے گا،وزیر اعظم ہاؤس میں ڈاکٹر ابراہیم رئیسی اور وزیراعظم شہباز شریف میں انفرادی ملاقات ہو گی،انفرادی ملاقات کے بعد صدر ابراہیم رئیسی اور وزیراعظم شہباز شریف کے درمیان باضابطہ وفود کی سطح پر مذاکرات ہوں گے،وزیر اعظم ہاؤس میں 7 سے 8 پاک ایران مفاہمتی یاداشتوں پر دستخط ہوں گے, دونوں سربراہان پالیسی بیان دیں گے جو لائیو نشر ہو گا,وزیر اعظم شہباز شریف مہمان صدر اور ان کے وفد کے اعزاز میں ظہرانہ دیں گے۔

اس کے علاوہ  ایرانی صدر کی آج اسپیکر قومی اسمبلی, چئیرمین سینیٹ اور متعدد وزراء سے نجی ہوٹل میں ملاقاتیں ہوں گی,ایرانی وزیر خارجہ حسین امیر عبداللہیان وزارت خارجہ میں وزیر خارجہ اسحاق ڈار سے ملاقات کریں گے,آج شام ایرانی سفیر رضا امیری مقدم ایرانی صدر کے اعزاز میں عشائیہ دیں گے،آج رات ایرانی صدر کی ایوانِ صدر میں صدر آصف علی زرداری سے ملاقات ہو گی،سلح افواج کے سربراہ سید عاصم منیر سے بھی ملاقات کا امکان ہےجبکہ صدر مملکت ایرانی وفد کے اعزاز میں عشائیہ دیں گے۔

 سفارتی ذرائع کا مزید کہناہے کہ ایرانی صدر ابراہیم رئیسی کل صبح لاہور پہنچیں گے،لاہور میں ایرانی صدر کی وزیراعلیٰ پنجاب مریم نواز اور گورنر پنجاب بلیغ الرحمان سے ملاقاتیں ہوں گی,گورنر پنجاب کی جانب سے ایرانی صدر کو ظہرانہ دیا جائیگا, لاہور میں ڈاکٹر ابراہیم رئیسی علامہ اقبال کے مزار پر حاضری دیں گے ،جس کے بعد ایرانی صدر کل سہہ پہر کراچی پہنچیں گے۔

کراچی میں ایرانی صدر کی وزیراعلیٰ سندھ مراد علی شاہ اور گورنر سندھ کامران ٹیسوری سے ملاقاتیں ہوں گی، صدر ابراہیم رئیسی کراچی میں مزارِ قائد پر حاضری دیں گے، ایرانی صدر کو کراچی میں گورنر سندھ کی جانب سے ظہرانہ دیا جائے گا اور  ایک بزنس فورم میں بھی شرکت کریں گے۔

 سفارتی ذرائع کا کہناہے کہ ایرانی صدر رات کراچی میں ہی قیام کریں گے،دورے کے خاتمے پر کراچی میں پاک ایران مشترکہ اعلامیہ جاری ہو گا, بدھ کے روز ایران کے صدر سری لنکا روانہ ہو جائیں گے،وہ سری لنکا کا ایک روزہ دورہ شروع کریں گے،جنوری کی کشیدہ صورتحال کے بعد اعلٰی سطح کے دورے سے پاک ایران مثبت اعتماد سازی میں مدد ملے گی۔

دورے کے دوران مشترکہ چیلنجز بشمول انسداد دہشت گردی, انسانی اسمگلنگ, پاک ایران آزادانہ تجارتی معاہدے پر پیشرفت ہو گی۔

پاک ایران فیری سروس و میری ٹائم تعاون کے فروغ کا بھی جائزہ لیا جائے گا, انسداد منشیات، نئے فری تجارتی و اقتصادی زونز، سرحدی منڈیوں کے قیام سمیت سرحدی انتظام پر تبادلہ خیال کیا جائے گا،ایران پاکستان گیس پائپ لاین پر بھی تبادلہ خیال کا امکان ہے,افغانستان کی صورتحال پر بھی غور کیا جاے گا, افغانستان کی موجودہ صورتحال سے پاکستان اور ایران دونوں متاثر ہو رہے ہیں۔

سفارتی ذرائع کا کہناہے کہ  پاکستان اور ایران کا غزہ کی صورتحال پر یکساں موقف ہے, ایران نے مسئلہ کشمیر پر ہمیشہ اعلانیہ پاکستان اور کشمیریوں کی حمایت کی ہے, دونوں ممالک کا اسلامو فوبیا کے خلاف بھی موقف مماثلت رکھتا ہے, ہر برس 7 لاکھ سے زائد زائرین ایران مقامات مقدسہ کی زیارت کے لیے دورہ کرتے ہیں, دونوں ممالک کے درمیان باہمی تجارتی حجم کو 5 ارب ڈالرز تک پہنچانے کی کوشیش جاری ہے, حالیہ دورے کا ایجنڈا باہمی اعتماد سازی, باہمی تعلقات و باہمی تعاون کا فروغ ہے۔

 سفارتی ذرائع کے مطابق ایرانی صدر کی اہلیہ جمیلہ عالم الہدی کی سرکاری مصروفیات میں شرکت محدود رہے گی, جمیلہ عالم الہدی ایک یونیورسٹی اور پاکستان سویٹ ہومز کا دورہ کریں گی۔

یہ بھی پڑھیں:پی پی 158 لاہور: سنی اتحاد کے مونس الٰہی کو شکست، لیگی امیدوار نے میدان مار لیا

سفارتی ذرائع کا مزید کہناہے کہ  ایرانی سربراہ مملکت کے دورے کا ایران آسرائیل کشیدگی سے کوئی تعلق نہیں ہے, ایرانی صدر کا دورہ مہینوں پہلے ایرانی وزیر خارجہ کے دورے کے دوران طے کیا گیا تھا۔

ترجمان دفتر خارجہ نے کہا ہے کہ دورے کے دوران ایرانی صدر پاکستانی ہم منصب، وزیر اعظم، چیئرمین سینیٹ اور سپیکر قومی اسمبلی سے ملاقات کریں گے، ایرانی صدر کی صوبائی قیادت سے ملاقاتیں بھی متوقع ہیں۔

ایران کے صدر کل بروز منگل 23 اپریل کو کراچی پہنچیں گے اس موقع پر کمشنر کراچی نے شہر میں عام تعطیل کا اعلان کر دیا، جس کا باقاعدہ نوٹیفکیشن جاری کر دیا گیا ہے، نوٹیفکیشن کے مطابق شہر قائد میں تمام نجی، سرکاری دفاتر اور تعلیمی ادارے بند رہیں گے۔