لیجنڈز کرکٹ لیگ: ایشین لائنز کو ورلڈ جائنٹس کے ہاتھوں شکست

(ویب ڈیسک) دوحا میں جاری لیجنڈز لیگ کرکٹ میں پاکستانی کرکٹ ٹیم کے سابق کپتان شاہد آفریدی کی ٹیم ایشین لائنز کو ورلڈ جائنٹس کے ہاتھوں شکست کا سامنا کرنا پڑا۔

ایشین لائنز کی ٹیم کے کپتان شاہد آفریدی نے ٹاس جیت کر پہلے بولنگ کا فیصلہ کیا، حریف ٹیم کی طرف سے ہاشم آملہ اور کرس گیل نے اننگز کا آغاز کیا، تیسرے اوور میں ہی گیل دو سکور بنا کر رن آؤٹ ہوگئے۔

29 کے مجموعی سکور پر شین واٹسن بھی چلتے بنے، انہوں نے 11 گیندوں پر 6 رنز بنائے، اس دوران جنوبی افریقا سے تعلق رکھنے والے ہاشم آملہ اور جیک کیلس کے درمیان زبردست شراکت داری ہوئی۔

ہاشم آملہ نے 59 گیندوں پر 68 رنز بنائے، ان کی اس باری میں 9 چوکے اور ایک چھکا شامل تھا جبکہ جیک کیلس 43 گیندوں پر 56 رنز بنا کر ناٹ آؤٹ رہے۔

ورلڈ جائنٹس نے مقررہ اوورز میں تین وکٹوں کے نقصان پر 150 رنز بنائے۔ سہیل تنویر اور محمد عامر نے ایک ایک وکٹ حاصل کی۔

The Giants dominate their way to the finals! ????????

World Giants won by 20 runs in the ultimate showdown of Match Day 6 of the season! ????#LegendsLeagueCricket #SkyexchnetLLCMasters #LLCT20 #YahanSabBossHain pic.twitter.com/Zsc2cIaJ0v

— Legends League Cricket (@llct20) March 16, 2023

ہدف کے تعاقب میں ایشین لائنز نے جارحانہ انداز اپنایا لیکن پانچویں اوور کی آخری گیند پر اوپل تھرنگا 10 گیندوں پر 4 رنز بنا کر کرسٹوفر موفو کی گیند پر بولڈ ہوگئے۔ 53 کے مجموعے پر تھیسارا پریرا بھی 12 سکور بنا کر بیٹ کی شاندار گیند پر بولڈ ہوئے۔

9 اوورز میں 58 کے مجموعی سکور پر دلشان 28 گیندوں پر 37 رنز بنا کر چلتے بنے، انہوں نے پانچ چوکے اور ایک چھکا لگایا، اس دوران دیگر بیٹرز قابل ذکر کارکردگی نہ دکھا سکے۔

محمد حفیظ 13، مصباح الحق 5، شاہد آفریدی 26 جبکہ سہیل تنویر 5 رنز بناکر پویلین لوٹے۔

ورلڈ جائنٹس کی طرف سے کرسٹوفر موفو اور ٹینو بیسٹ نے 3.3 وکٹیں حاصل کیں جبکہ بریٹ لی اور سمٹ پٹیل نے ایک ایک شکار کیا۔ میچ میں زبردست بیٹنگ کرنے پر ہاشم آملہ مرد میدان قرار پائے۔