ابھی تو تحریک کا آغاز ہوا ہے : ٹرمپ کا الوداعی بیان

(24نیوز) امریکی صدر ڈونلڈ ٹرمپ کا اپنے الوداعی بیان  میں کہنا ہے کہ بطور صدر جو تحریک شروع کی ابھی صرف اس کا آغاز ہے،امریکا کو دنیا میں دوبارہ قابل عزت بنائیں گے۔انہوں نے کہا  مجھے فخر ہے کہ اپنے دور اقتدار میں کوئی نئی جنگ شروع نہیں کی اور عوام سے کئے گئے تمام وعدے پورے کئے۔

وائٹ ہاؤس سے رخصتی سے قبل صدر دونلڈ ٹرمپ نے الوداعی پیغام کہا کہ ہم نے وہی کیا جو ہم کرنے آئے تھے بلکہ اس سے بھی کئی زیادہ کیا تاہم مجھے فخر ہے اپنے دور اقتدار میں میں نے کوئی نئی جنگ شروع نہیں کی۔  ڈونلڈ ٹرمپ نے مشرق وسطیٰ میں اپنی کامیابیوں کا ذکر کرتے ہوئے کہا کہ جرات مندانہ، اصولوں اور حقیقت پسندی پر مبنی سفارت کاری کے ذریعے ہم نے مشرق وسطیٰ میں تاریخی معاہدے کرکے کامیابی حاصل کی جبکہ انہوں نے ایرانی جنرل قاسم سلیمانی کی ہلاکت کو بھی اپنی کامیابی قرار دیا۔

اپنے الوداعی پیغام میں ٹرمپ نے کیپٹل ہل پر حملے پر بات کرتے ہوئے کہا کہ اس حملے سے تمام امریکی خوفزدہ ہوئے اور سیاسی تشدد ہر اس چیز پر حملہ ہے جس کو ہم بحیثیت امریکی سراہتے ہیں، اسے کبھی برداشت نہیں کیا جا سکتا۔ انہوں نے مزید کہا کہ ان کی انتظامیہ نے دنیا کی تاریخ کی سب سے بڑی معیشت کو تعمیر کیا جب کہ ہمارا ایجنڈا ریپبلکن یا ڈیموکریٹکس کے بارے میں نہیں بلکہ قوم کی بہتری کے لیے تھا۔

واضح رہے کہ امریکا کے 45ویں صدر ڈونلڈ ٹرمپ اپنی صدارتی مدت پوری کرنے کے بعد رخصت ہورہے ہیں اور نومنتخب صدر جوبائیڈن آج اپنے عہدے کا حلف اٹھائیں گے جو اگلے 4 سال کے  لئے وائٹ ہاؤس منتقل ہوجائیں گے۔ امریکی روایت کے مطابق جانے والا صدر حلف برداری کی تقریب میں شرکت کرتا ہے تاہم ڈونلڈ ٹرمپ ایسا نہیں کریں گے۔